د طالبانو سفیر کابل کې له خپلو چارواکو سره له پاکستانه د افغان کډوالو پر ایستلو خبرې کړې
په اسلام اباد کې د طالبانو سفیر سردار احمد شکیب په کابل کې د دې ډلې د کډوالو ستونزو ته د رسېدنې عالي کمېسیون په غونډه کې ګډون وکړ. په اسلام اباد کې د طالبانو سفارت لیکلي چې طالبانو له ګاونډیو هیوادونو غوښتي، چې د افغان کډوالو له جبري شړلو ډډه وکړي.
په اسلام اباد کې د طالبانو سفارت نن دوشنبې «د کپ ۲۷مه» په اېکسپاڼه کې لیکلي، چې د سفارت سرپرست په کابل کې د ریاست الوزرا اداري مرسیتال عبدالسلام حنفي په مشرۍ د کډوالو ستونزو ته د رسېدنې عالي کمېسیون په غونډه کې کډون وکړ.
په پاکستان کې طالبانو سفیر په دغه هېواد کې د افغان کډوالو عمومي وضعیت، د ای سي سي کارت لرونکو کډوالو لپاره د ټاکل شوي ضرب الاجل او په دې اړه د پاکستاني حکومت دریځ، د هغوی اساسي غوښتنې لکه د شتمنیو د انتقال په برخه کې د اسانتیاوو برابرول، سرپناه، افغانستان کې کاري او تعلیمي فرصتونه او اړوندو موضوعاتو په اړه عالي کمیټې ته معلومات وړاندې کړل.
په اسلام اباد کې د طالبانو سفارت لیکلي: «چې طالبانو له ګاونډیو هیوادونو وغوښتل، چې د افغان کډوالو له جبري شړلو ډډه وکړي، او د دوی د بېرته ستنیدو لپاره د یو ګډ درې اړخیز میکانیزم له مخې اقدامات وکړي.»
د دغه کمېسیون غړو ټینګار وکړ، چې د کډوالو د ستونزو د حل په موخه به خپل اقدامات چټک او په ځانګړې توګه د افغان سوداګرو لپاره د پانګونې فرصتونه رامنځته کړي.
د کېمسون په دې غونډه کې د ملګرو ملتونو، د اسلامي همکاریو سازمان، اروپايي ټولنې او نورو نهادونو غوښتنه وشوه، چې د افغان کډوالو حقوقو ته جدي توجه وکړي او د کوربه هیوادونو له چارواکو سره د عودت سالمې پروسې په اړه کار وکړي او له راستنېدونکو سره خپلې بشري مرستې پراخې کړي.
د پښتونخوا سر وزیر علي امین ګنډاپور تېره ورځ خبري ناسته کې د افغان کډوالو ایستلو په اړه د مرکزي حکومت د پالیسۍ مخالفت وکړ او ویې ویل چې افغان کډوال باید په زور ونه ایستل شي.
پاکستان پرېکړه کړې، چې «د مارچ تر ۳۱مې» نېټې پورې په دغه هېواد کې میشت ټول افغان کډوال ووځي.
