د پاکستان د تحریک انصاف ګوند د بنسټ اېښودونکي عمران خان خور عليمه خان د نوموړي په حوالې خبریالانو ته ویلي: «افغانستان زموږ دښمن نه دی، ولې پاکستاني چارواکي هڅه کوي، چې افغانستان زموږ دښمن کړي.»
د هغې په وینا؛ عمران خان د دواړو هېوادونو ترمنځ پر ترینګلي وضعیت اندېښنه څرګنده کړې او ویلي یې دي، چې «ولې تاسو د مسلمانو وروڼو سره د جګړې پیلولو هڅه کوئ.»
علیمه خان دغه څرګندونې د عمران سره تر لیدنې وروسته د اډیاله زندان بهر له رسنیو سره په خبرو کې کړې دي.
نوموړې دارنګه د خبریالانو د یوې پوښتنې په ځواب کې وویل: «عمران وویل، که د امنیتي پېښو کچه وګورئ؛ ترهګري تر ۲۰۲۱ کاله پورې کمه شوې وه او په ۲۰۲۲کال کې یې بیا وده وکړه.»
دغه څرګندونې وروسته له هغه کېږي، چې په تېرو وروستیو کې د طالبانو او پاکستان ترمنځ اړیکې خورا ترینګلې شوې دي او پاکستان په دغه هېواد کې د وروستي کړکېچن حالت د پړې ګوته طالبانو ته نیسي.
پاکستاني چارواکي طالبان تورنوي، چې د افغانستان په خاوره کې یې ترهګرو ته پټنځایونه ورکړي او ترهګر له هغه ځایه د دوی پر وړاندې لوی بریدونه پلانوي او له فرضي کرښې دې خوا اوړي؛ خو دا هغه ادعاوې دي، چې طالبانو تل رد کړې دي.
تازه د پاکستان پوځ ادعا کړې، چې د بلوچستان په جعفر اېکسپرېس اورګاډي د برید پرمهال بریدګر په پرلپسې توګه په افغانستان کې له خپلو مسوولینو سره په اړیکه وو.
له بل پلوه د تورخم دروازه هم د ډیورنډ کرښې په اوږدو کې د طالبانو لهخوا د پوستې د جوړولو له امله له تېرو ۲۶ورځو راهیسې تړلې ده.
د دغو ۲۶ ورځو په لړ کې د دواړو خواوو ترمنځ څو ځله نښتې هم شوې دي؛ خو د دواړو خواوو د سوداګرو او قومي مشرانو تر جرګې وروسته یې اوربند وکړ.
