د جرمونو نړیوالې محکمې ویلي، سوډان دې محکمې ته له متحده عربي اماراتو د نسل وژنې د ملاتړ عریضه کړې او دوی دا قضیه څیړي. سوډان ادعا کړې چې متحده عربي امارات د سوډان نیمه پوځي ځواکونو ته وسلې ورکړې او هغوی د دغه هېواد په دارفور کې نسل وژنه کوي.
سوډان متحده عربي امارات تورن کړی، چې د سوډان د نیمه پوځي چټک ملاتړ ځواکونو ته وسلې ورکوي او یاد ځواکونه د تېرو دوو کلونو راهیسي د سوډان له پوځ سره په کورنۍ جګړه کې ښکیل دي.
متحده عربي اماراتو د سوډان دا تورونه رد کړي، خو د ملګرو ملتونو کارپوهان او د امریکا قانون جوړونکي یې د منلو وړ بولي.
د متحده عربي اماراتو یو چارواکی وایي:«د جرمو نړیواله محکمه کې د سوډان د وسله والو ځواکونو کړنې له یوې سیاسي او تبلیغاتي لوبې پرته بل څه نه دي. سره له دې چې متحده عربي امارات د سوډان له خلکو سره خپله بشري ژمنتیا کې ټینګ پاتې دي او د دواړو لوریو لخوا رامنځته شوي بشري ناورین کمولو باندې تمرکز کوي.»
سوډان د جرمونو نړیوالې محکمې ته شکایت کړی، چې د سوډان د نیمه پوځي ځواکونو او د متحده عربي اماراتو ملیشو په ۲۰۲۳ کال کې د سوډان په لویدیځ دارفور کې پر غیر عرب مسالیت قبیلې شدید بریدونه کړي.
امریکا د ۲۰۲۴ کال په جنوري میاشت کې په دارفور ولایت کې دا بریدونه نسل وژنه وبلله.
سوډان له جرمونو نړیوالې محکمې غوښتنه کړې، چې متحده عربي اماراتو ته امر وکړي، څو په دارفور کې د نسل وژنې مخنیوی وکړي.
د جرمونو نړیواله محکمه وايي، چې د اپریل په لسمه به د سوډان غوښتنه واوري.
