طالبانو د خپل مشر پیغام "بېوزلي استخباراتي تبلیغات دي" تر شعار لاندې پر خلکو وېشلی دی

سرچیني وايي، دا وسلې جومات په داخل، دیوالونو او شاوخوا کې اېښودل شوې وې.

د سرچینو د معلوماتو له مخې، په عیدګاه جومات کې عامو لمونځ کوونکو ته د مبایل د استعمال اجازه نه ورکول کېده او د طالبانو له لوري د تلفون د استعمال د مخنیوي لپاره کلکه څارنه کېده.

د سرچینو د معلوماتو له مخې، د کندهار په عیدګاه جومات او شاوخوا سیمو کې د تېرو څو ورځو راهیسي، د ملا هبت الله شخصي ساتونکو قطعه ځای پر ځای شوي وه او په یاده سیمه کې نږدې یې عامو خلکو ته د تګ راتګ اجازه نه ورکول.

د طالبانو مشر ملا هبت الله تر اوسه د رسنیو پر مخ نه دی راښکاره شوی او د خپلو ډیر محدودو کسانو سره ګوري.

سرچینو د معلوماتو له مخې په عیدګاه جومات کې ځای پر ځای شوي وسلې د له لویو جګړو کې استعمالیږي او ښايي طالبانو یادې وسلې د خپل قدرت ښودونې په موخه دلته ځای پر ځای کړي وي.

د طالبانو تر واک لاندې د ارګ پاڼې د یکشنبې په ورځ اعلان وکړ، چې د اختر لمونځ په ارګ کې د دې ډلې د اقتصادي او اداري مرستیالانو او د ریس الوزرا د دفتر عمومي رییس په شتون کې وکړ.

په ورته وخت کې د طالبانو د کابینې یو شمېر غړي، د بهرنیو چارو وزیر امیر خان متقي او په کابل کې د بهرنیو هېوادونو ډېپلوماتان په سپېدار ماڼۍ کې د کوچني اختر د لمانځه په مراسمو کې حاضر وو.

مولوي عبدالکبیر، د طالبانو د ریاست الوزرا پخوانی سیاسي مرستیال، چې د مرغومي په ۲۰مه د دې ډلې د کډوالو د وزیر په توګه ټاکل شوی و، لا تر اوسه له سپېدار ماڼۍ نه دی وتلی او له هغه ځایه کار کوي.
په دې ماڼۍ کې د هغه له خوا د اختر جلا لمونځ د طالبانو د مشرانو ترمنځ د درز نښه څرګندوي او د ډلې دننه د داخلي شخړو په اړه اټکلونه پیاوړي کړي.
مولوي عبدالکبیر، چې د کډوالو چارو وزارت ته د خپلې دندې له ټیټېدو ناخوښه ښکاري، د طالبانو د مشر ملا هبت الله اخوندزاده د حکم له صادرېدو نهه ورځې وروسته په دې دنده کې کار پیل کړ.

د کډوالو چارو د وزیر په توګه د عبدالکبیر د ټاکل کېدو دوو میاشتو زیات وخت تېر شوی او دا لا هم روښانه نه ده چې ولې هغه له سپېدار ماڼۍ او خپل پخواني کاري ځای نه دی وتلی.
په پخواني حکومت کې، سپېدار ماڼۍ د ملي یووالي حکومت د تړون پر بنسټ د واک د شریکولو سمبول وه، چې د اجرایوي واک نیمایي برخه یې ډاکټر عبدالله ته ورکړې وه.

وروسته له هغه چې طالبانو واک ترلاسه کړ، مولوي عبدالکبیر، چې ویل کیږي د سراج الدین حقاني له نژدې کسانو دی، د دې ماڼۍ کنټرول په لاس کې واخیست.

ښاغلی هبت الله زیاتوي، چې د دغې ډلې عالمان بوخت دې چې د «غرب» له اثر خلاص قانون جوړ کړي.

ملا هبت الله هغو نیوکو ته په اشاره چې افغانستان کې اساسي قانون نشته وايي:« موږ شپه او ورځ اخته یو، علما اخته دي. ګورئ داسي قانون نشته چې د غرب له چینې را روان وي. خود داسې قانون نشته. قانون دغه دی چې موږ یې دلته جوړ وو، سرچینه یې هم دلته ده او متخصصین یې هم دلته دي او جوړیږي هم دلته د غرب څخه کافي نشته. هغه غربي کارپوهان دلته کار نه پکښيې کوي..»

هبت الله په خپلو خبرو کې د دغه ډلې د نوې قانون په اړه وايي، چې د پخواني قانون هیڅ ماده او په هغه قانون اصلاح او تعادیل ورته د منلو وړ نه دی.« په عدليې وزارت کې به یې علما تر نظر باسي، هغه به الفاظ ور اصلاح کوي ګوري به یې، بیا به یې سترې محکمې ته استوئ، ستره محکمه به یې ګوري بیا به یې ماته استوئ. اوس چې هغه تر دې مراحلو تېر شوي دي ماته راغلي دي. بعضي داسې قوانین دې چې هغه زاړه اصلاح شوي دي، تعدیل شوي دي هغه ما بېرته په لاس ورکړي دي. ځئ داسې قوانین به جوړوی، چې خالص به پر شریعت جوړ وي، تاسي به یې دلته جوړوی د بل ځای مداخله به نه وي پکښي.»

نوموړی وايي، چې د دغې ډلې د عدلي وزارت او سترې محکمې تر کتنې وروسته ټول جوړیدونکي قوانین د ورستي ځل لپاره خپله ګوري.

تردې وړاندې د طالبانو ویاند ذبیح الله مجاهد له رسنیو سره خبرو کې ویلي و، چې د افغانستان پخواني اساسي قانون ځیني مادې د تعادیل وړ دي او د دغې ډلې نوی قانون به ډیر ژر توشیح شي.

قانونپوهانو پر طالبانو نیوکه کوي، چې لا یې هم د نږدې درې نیمو کلونو واکمنۍ سره اساسي قانون نشته، چې له امله یې خلک سرګردان او د دې ډلې مختلفې ادارې د یوې بلې په چارو کې لاسوهنه کوي.

یوسف وفا وايي چې د دوی اوسنی نظام د وینو په زور راغلی او چاته یې د تخریب اجازه نه ورکوي.

په بلخ کې د طالبانو والي یوسف وفا چې ملا هبت الله له نژدې کسانو شمېرل کېږي.

نوموړي د تېر کب په ۶مه د طالبانو د بهرنیو چارو وزارت له سیاسي مرستیال شیر محمد عباس ستانکزي د طالبانو سترې محکمې ته شکایت کړی و، چې ولې یې د دې ډلې پر مشر هبت الله اخوندزاده نیوکه کړې ده.

د یوسف وفا له دفتر د سلواغې په لومړۍ نېټه د طالبانو سترې محکمې ته د لېږل شوي رسمي لیک له مخې، د بلخ والي غوښتنه کړې چې ستانکزی د طالبانو د مشر د "بې احترامۍ" په تور محاکمه شي.

هبت الله اخوندزاده د کندهار ښار په عیدګاه جومات کې د کمکي اختر دوینا په یوه برخه کې د مخالفتونو په له منځه وړلو او له نوموړي په اطاعت کولو باندې ټینګار وکړ.

هبت الله اخوندزاده وویل، چې زما اطاعت وکړئ، اختلافونه به ختم شي.

د طالبانو مشر په خپله وینا کې وايي:«دا اطاعت کوئ، دا اطاعت د مسلماني یو حکم دی. که تاسو ماته د امام په سترګه ګورئ که نه ګورئ، زه وایمه اول خو وګورئ خو غاړې به مو خلاصې شي، ځکه پر مسلمانانو باندې فرض ده، چې یو امام به دروي، یو مشر به دروي ، د هغه تر شا به دریږي تر څو د دوی اخلافات ختم شي او جامعه یې منظمه شي. اوس خو دا دی دا جامعه جوړه ده، مشر لري، دا نظم را جوړ دی.»

همدارنګه ښاغلی هبت الله زیاتوي:« اوس د مسلمانانو د مشر که یو حکم وکړي اطاعت یې وکړئ، ځکه که اطاعت ونه کړئ، یو یوې خواته ولاړ شئ او بل بلې خواته ولاړ شئ اخیر به په جنګو اخته کیږئ لکه دا مخکې چې و.»

که څه هم نوموړي خپلو خبرو کې د خپل حکومت چارواکو ته اشاره ونه کړه، خو د طالبانو د بهرنیو چارو وزارت مرستیال عباس ستانکزی له دوو میاشتو ډېر وخت کېږي چې په دوبۍ کې دی.

د دې ډلې د کورنیو چارو وزیر سراج الدین حقاني هم نږدې همدومره وخت خپل دفتر ته نه دی تللی او لامل یې هم د ښاغلي اخوندزاده له پالیسۍ سره مخالفت ښودل کېږي.

له هبت الله اخوندزاده سره د دغو طالب چارواکو مخالفت هم د نجونو او ښځو د زدکړو او کار باندې د بندیز له امله بلل کېږي، چې د ولس او طالبانو ترمنځ یې واټن زیات کړی دی.

خو ملا هبت الله اخوندزاده په خپله وینا کې وویل، چې نړيوال خلک هڅوي چې د نوموړي اطاعت ونه کړي.

هبت الله تر خپل لاس لاندې کسانو ترڅنګ په ټولو کسانو ږغ کوي، چې د هغه د ټولو صادریدونکو حکونو اطاعت وکړي.

نوموړي وویل:«اطاعت کوئ، چې حکم صادر شو تر شا یې دریږئ،، علما هم دریږئ، عام خلک هم دریږئ، مجاهدین هم دریږئ قدر یې کوی، دا ستاسو د اتفاق د وحدت، د دې نظم لپاره یو مهم رکن دی. اطاعت کوئ.»

هغه په خپلو خبرو کې زیاته کړه، چې که کوم حکم یې ناروا وي، خلک دې یې نه مني: «هیڅ اطاعت مه کوئ. خو که یو حکم له شریعت څخه مخالف نه وي نو بیا چې یو یو څه وايي، بل بل څه وايي، اختلاف کوي او دا دنیا کوښښ کوي، چې د مشر اطاعت مه کوئ. دا مشر مو غطلت سړی دی، نو ګټه یې چاته رسیږي، کفارو ته رسیږي.»

خو د ښځو په برخه کې د نوموړي ډېری داسې حکمونه دي چې د نورې اسلامي نړۍ عالمان یې له اسلام سره ټکر کې بولي.

همدارنګه د طالبانو مشر په خپلو خبرو کې د تېر په څېر پر یوالي هم ټینګار وکړ او ویې ویل: «له انتقام اخیستلو او قومي کولو تېر شئ عفوه وکړئ. انتقام مه اخلئ، قومي مه کوئ، عفوه سره وکړئ. شخصي او ټولنیز اختلاففونه پریږدئ، اختلافونه مه قوی بیا به مو قوت له منځه ولاړ شي.»

که څه هم د طالبانو تر واکمنېدو مخکې هبت الله اخونزاده ټولبښنه اعلان کړه، خو تر اوسه هم د دې ډلې له خوا د پخواني حکومت ماموران په تېره د امنیتي ادارو غړي، بندي، شکنجه او ان وژل کېږي.

وروستۍ بېلګه یې هم د کورنیو چارو وزارت یو افسر حسن جبارخېل دی چې تېره اونۍ د کابل په شکر دره کې ووژل شو.

ډګرمن حسن جبارخېل نږدې لس ورځې وړاندې د کابل ښار په کلوله پشته کې له خپل کور اېستل شوی و او مړی یې شکردره کې وموندل شو.