د پښتونخوا سر وزیر علي امین ګنډاپور د مردان په کاټلنګ سیمه کې د وسلهوالو په وړاندې د عملیاتو پرمهال د ولسي وګړو د وژنې په اړه غبرګون ښودلی. ښاغلي ګنډاپور ویلي، چې د ترهګرو پر وړاندې د عملیاتو په ترڅ کې د ولسي وګړو وژنه د غندلو او اندېښنې وړ خبره ده.
د پښتونخوا په مردان کې (د وري په ۸مه) د شپې ناوخته د پاکستاني پوځیانو په هوايي برید کې د دوو ځايي شپنو کورنۍ په نښه شوې، چې د ښځو او ماشومانو په ګډون په کې ۱۰ کسان ووژل شول.
خو په خواله رسنیو کې د پاکستان د استخباراتو اړوندو ادرسونو هغه مهال لیکلي و، چې په دغه بریدونو کې یې د ټيټيپي غړي او د هغوی مرستندویان وژلي دي.
د کاټلنک ولسوالۍ اوسېدونکو (د وري په ۹مه) د لسو وژل شویو جسدونه د احتجاج په توګه د مردان او سوات لویې لارې (موټروې) ته راوړي وو او لاره یې هم د اعتراض په توګه تړلې وه.
خو د پښتونخوا د سر وزیر د اطلاعاتو سلاکار علي سېف تازه د علي امین ګنډاپور لهخوا دغه پیغام خپور کړی دی.
په دغه پیغام کې راغلي، چې مرکزي حکومت د پښتونخوا حکومت ته د دغه اقدام په اړه مخکې تر مخکې څه نه و ویلي.
نوموړي پر مرکزي حکومت د نیوکې سره ویلي، چې دغه ډول ناسمې کړنې او نه همغږي کولای شي ترهګرۍ ته لمن ووهي او د خلکو احساساتو ته زیان ورسوي.
نوموړي دارنګه د شهباز شریف لهخوا د دغې پېښې په تړاو په نه غبرګون نیوکه کړې.
هغه ویلي: «دا د سیاسي ډرامو وخت نه دی؛ بلکې د یووالي وخت دی. د پېښې لامل باید په بې پرې توګه وڅېړل شي او نیمګړتیاوې روښانه شي.»
هغه خبرداری ورکړی، چې صوبايي حکومت به په راتلونکې کې هیڅکله د دغه ډول کړنو اجازه ورنه کړي.
نوموړي دارنګه د دغې پېښې د پلټنې امر کړی او ویلي یې دي، چې د حقیقت تر څرګندېدو وروسته به د پښتونخوا حکومت په دې اړه خپل دریځ روښانه کړي.
نوموړي دغه راز د قربانیانو کورنیو سره خواخوږي څرګنده کړې او ورسره یې د بشپړ مالي ملاتړ ژمنه کړې ده.
تر دې وړاندې د پښتون ژغورنې غورځنګ مشر منظوراحمد پښتین ویلي و، د پنجابي پوځ لهخوا د پښتونخوا د مردان په کاټلنګ کې وژل شوي بېګناه وګړي د پنجاب سیاسي مشرانو او د هغوی د جاسوسانو لهخوا د رسنیو له لارې د ګناهګار ثابتولو هڅې روانې دي.
پښتین زیاته کړې، چې له شهباز شریف، علي سیف، رانا ثناءالله نیولې تر عطاالله تارړ پورې ټولو یو شان بیانونه ورکړي، چې دغه وژنې یو «ښه کار» دی.
