رویټرز راپور ورکړی، چې ایران له امریکا سره د مستقیمو خبرو پرځای غیر مستقیمو خبرو ته چمتووالی ښودلی، خو د سیمې هېوادونو ته یې خبرداری ورکړی، چې که د امریکا له بریدونو سره مرسته وکړي ښه پایله به ونه لري.
رویټرز د یوه لوړپوړي ایراني چارواکي له قوله خبر ورکړی، چې ایران د خپل اټومي پروګرام په اړه له امریکا سره د مستقیمو خبرو اترو مخالفت کړی او غواړي د عمان له لارې له واشنګټن سره غیر مستقمي خبرې وکړي.
یاد چارواکي ویلي:«غیر مستقیمي خبرې دا امکان برابروي، چې د سیاسي حل لپاره د واشنګټن جدیت و ارزول شي.»
پر همدغه مهال ایراني چارواکو عراق، کویټ، متحده عربي امارات، قطر، ترکیې او بحرین ته رسما خبرداری ورکړی، چې که د امریکا له برید سره مرسته وکړي سختي پایلې به ولري.
دغه ایرانی چارواکی زیاتوي:« علي خامنه يي د ایران وسله والو ځواکونو ته د بشپړ تیارسي حالت امر کړی.»
د امریکا ولسمشر ډونالډ ټرمپ ایران ته دوه میاشتې وخت ورکړی، چې د اټومي پروګرام په اړه یوې هوکړې ته ورسیږي او د نه رسیدو په صورت کې یې د نظامي اقدام خبرداری ورکړی.
ټاکل شوې، چې د ایران او امریکا ترمنځ خبرې د عمان په پلازمېنه دمشق کې د عمان په منځګړیتوب ترسره شي.
خامنه يي په دې خبرو کې د ایران د بهرنیو چارو وزیر عباس عراقچي یا د هغه مرستیال مجید تخت روانچې ته د ګډون اجازه ورکړې ده.
ایران له اوږدې مودې راهیسې د اټومي وسلو جوړول ردوي، خو د ملګرو ملتونو د اټومي څار ادارې خبرداری ورکړی، چې ایران په ډراماټیک ډول د یورانیمو غني کولو کچه ډیره کړې او اټومي وسلو جوړولو ته نږدې شوی.
