په یمن کې د حوثي قوماندانانو پر یوې غونډې د امریکا په هوايي برید کې ۷۰ کسان وژل شوي دي

د یمن د الحدیده په سوېل التحیتا سیمه کې د اسلامي جمهوریت تر ملاتړ لاندې د حوثي قوماندانانو په یوې غونډه د امریکا د جنګي الوتکو په برید کې د څو جګپوړو قوماندانانو په ګډون د دغې ډلې ۷۰ غړي وژل شوي دي.

تر دې لږ مخکې حوثي رسنیو د یکشنبې په ورځ د یمن په الحدیده ولایت کې پر کامران ټاپو د امریکا د څلورو هوايي بریدونو خبر ورکړ.

د شنبې په ماښام د امریکا د مرکزي قومندانۍ (سېنټکام) له خوا په اېکس کې خپرې شوې ویډیوګانې ښيي، چې د متحده ایالاتو هوایي ځواکونه په یمن کې د اسلامي جمهوریت ملاتړو د حوثي یاغیانو باندې د برید لپاره جنګي جیټ الوتکو تیاری ننداره کوي.

سېنټکام لیکلي: "زموږ د الوتکې وړونکي جنګي ډلې هاري اېس ځواکونه په سیمه کې ځای پر ځای دي او دوی د ایران په ملاتړ د حوثیانو پر ضد پرله پسې عملیات کوي.

دا په داسې حال کې ده، چې د امريکا جنګي الوتکو د ايران د اسلامي جمهوريت له ملاتړ څخه د برخمنو حوثيانو پر مرکزونو خپلو بريدونو ته زور ورکړی او لسګونه قومندانان یې وژلي دي.

د امریکا بریدونه د حوثيانو له خوا د سره سمندر په ستراتیژیکه سیمه کې د خطرونو له منځه وړلو لپاره ترسره کېږي.

دا هغه سیمه ده، چې د نړۍوالې سوداګرۍ لپاره حیاتي ارزښت لري او حوثيانو له ۲۰۲۳ کال راهیسې هلته څو بریدونه کړي او ادعا کوي، چې دا بریدونه د فلسطینیانو د ملاتړ لپاره ترسره کوي او د اسراییل اړوند کښتۍ په نښه کوي.