د پاکستان پوځ وايي، تېره شپه یې د دېره اسماعیل خان په تکواره سیمه کې د استخباراتي معلوماتو پر اساس عملیاتو کې د اورپکو د ځايي مشر شیرین په کډون یې ۹ وسلوال وژلي. د پوځ د عامه اړیکو دفتر زیاتوي چې دا وسلوال له سختې جګړې وروسته وژل شوي. پوځ د خپلې مرګ ژوبلې په هکله څه نه دي ویلي
دا اداره په خپله اعلامیه کې وايي چې له وژل شویو وسلوالو یې وسلې هم لاسته راوړې دي.
د پاکستان پوځ ادعا کړې، چې د وسلوالو وژل شوی مشر شیرین په ګڼو ترهګریزو فعالیتونو او د ځینو بې ګناه ملکي وګړو په هدفي وژنو کې لاس درلود.
وژل شوی قومندان د ۲۰۲۵ کال د مارچ په ۲۰مه د پاکستاني نظامي تورن حسنین اختر د وژلو مسوول هم و.
په غزه کې حماس وسلهوالې ډلې ویلي، چې د اسراییلي پوځ د بريدونو په ځواب کې یې د دغه هېواد سوېلي ښارونه په توغندیو وېشتي دي.
د رویټرز خبري اژانس د خبر له مخې؛ د اسراییل پوځ ویلي چې حماس ډلې شاوخوا لس توغندي توغولي دي؛ خو دوی په بریالیتوب سره شنډ کړي دي.
پر همدې مهال اسراییلي رسنیو په سوېلي ښار عسقلون د مخامخ برید خبر هم ورکړی دی.
د اسراییل د بېړنیو چوپړتیاوو ادارې ویلي، چې دوی د ټپي شویو درملنه کوي او کاري ټیمونه یې هغو سیمو ته په لار دي چې توغندي پرې لګېدلي دي.
د دغې ادارې لهخوا په خپرو شویو ویډیوګانو او انځورونو کې ښکاري، چې د موټرو ښیښې ماتې شوې دي او په ښار کې ګډوډي روانه ده.
حماس وسلهواله ډله په داسې حال کې پر اسرییل توغندیز برید کوي، چې پرون په غزه کې سیمهییزو روغتیایي چارواکو اعلان وکړ چې د اسراییل په برید کې ۳۹ تنه وژل شوي دي.
له دغه توغندیز برید وروسته د اسراییل پوځ پر اېکس پاڼه د غزې تړانګې د مرکزي ښار دېرالبلاح اوسېدونکو ته د سیمې د پرېښودو امر کړی دی.
د اسراییل پوځ د خبرداري په اعلامیه کې راغلي:« دا تاسو لپاره له برید وړاندې وروستی خبرداری دی.»
ویل کېږي، چې د اسراییل لومړی وزیر نتنیاهو د امریکا له ولسمشر ټرمپ سره د لیدنې لپاره د واشنګټن په سفر دی او د دغه هېواد د دفاع وزیر لهخوا ورته د توغندیز برید په اړه خبر ورکړل شوی دی.
د لومړي وزیر له دفتره په خپره شوې اعلامیه کې راغلي، چې بنیامین نتنیاهو د حماس ډلې په وړاندې د اسراییل د سختو عملیاتو په تایید سره د پرېکنده ځواب امر کړی دی.
اسراییل د مارچ په ۱۹مه وویل، چې د دوی ځواکونو د غزې په مرکزي او سوېلي سیمو کې ځمکني عملیات بیا پیل کړل. دواړو لورو یو بل د اوربند په خبرو کې په خنډ اچولو تورن کړي دي.
فلسطيني چارواکي وايي، د جګړې له پيل راهيسې پر غزې د اسراييل په بريدونو کې تر پنځوس زرو زيات فلسطينيان وژل شوي دي.
الجزیرې راپور ورکړی، چې د خان یونس په ناصر روغتون کې د خبریالانو پر خېمه د اسراییل په برید کې یو خبریال او یو بل فلسطینی ځوان وژل شوی دی. په دغه برید کې لږ تر لږه اوه خبریالان ټپیان شوي هم دي.
د فلسطیني خبریالانو ټولنې په خان یونس کې ناصر طبي کمپلېکس ته څېرمه د خبریالانو پر خېمه د اسراییل برید غندلی دی.
د فلسطین د خبریالانو ټولنې د خبریالانو په نښه کول جرم او له ټولو نړۍوالو قوانینو او کنوانسیونونه سرغړونه وبلله.
په دغه برید کې د احمد منصور په نوم یو خبریال سخت ټپي او سوځېدلی دی.
د راپور له مخې، د ټپي شوي یو بل خبریال حالت هم په نازک ښودل شوی دی.
یوه تازه څېړنه ښيي، چې د غزې جګړه د خبریالانو لپاره په تاریخ کې تر ټولو مرګونې او خونړۍ جګړه وه.
د ۲۰۲۳ کال د اکټوبر له ۷مې راهیسې د غزې په جګړو کې له ۱۴۷ تر ۲۳۲ پورې خبریالان وژل شوي دي.
په براون پوهنتون پورې اړوند (د جګړو د لګښتونو) د نوې پروژې د راپور پر بنسټ چې بوستون ګلوب ورځپاڼې خپور کړی، ښيي چې د ۲۰۲۳ کال د اکټوبر له ۷مې راهیسې د غزې په جګړو کې له ۱۴۷ تر ۲۳۲ پورې خبریالان وژل شوي دي.
د اسراییل ۱۴ ټلویزوني کانال د یوه جګپوړي چارواکي په حواله راپور ورکړی، چې اسراییل د ایران اسلامي جمهوریت لهخوا د احتمالي برید پر وړاندې د دفاع لپاره چمتو دی.
د ایران د احتمالي برید پر وړاندې د اسراییل د چمتووالي خبر وروسته له هغه خپور شو، چې دغه هېواد ته د امریکا متحده ایالاتو لهخوا د هوایي دفاع لپاره یو عصري سیستم ورکړل شو.
اسراییلي سرچینې ویلي:« دغه تجهیزات چې موږ ته رارسېدلي له امریکایانو سره زموږ د ګډو عملیاتو یوه برخه ده.»
هغه زیاته کړه:« ایران ته د امریکا د ولسمشر ډونالډ ټرمپ لهخوا یوه میاشت وخت ورکړل شوی، چې باید خپل ټول انتخابونه د خبرو اترو پر مېز وړاندې کړي.»
دغه څرګندونې په داسې حال کې کېږي، چې تېره وځ د اسراییل لومړي وزیر دفتر په یوه خپره کړې اعلامیه کې وویل چې بنیامین نتنیاهو به د دوشنبې په ورځ واشنګټن کې د امریکا له ولسمشر ټرمپ سره د ایران د اټومي پروګرام په اړه سره وګوري.
اکسوس وېبپاڼې د اسراییلي سرچینو په حواله ویلي، نتنیاهو په دې نظر دی چې د ایران د اټومي پروګرام په اړه د امریکا او اسراییل ترمنځ د یوې هوکړې احتمال لږ دی. له همدې کبله به د خبرو اصلي موضوع د ایران پر اټومي تاسیساتو د پوځي برید په اړه وي.
په تېرو څو اوونیو کې ټرمپ او نورو امریکايي سیاستوالو په وار، وار ویلي، چې اسلامي جمهوریت یوازې دوه انتخابه لري؛ یا به مذاکرات مني او د اټومي پروګرام په اړه به هوکړه وکړي او یا پوځي برید.
د ځینو رسنیو د راپورونو له مخې، ایران د مستقیمو خبرو اترو مسله منلې ده؛ خو د ټرمپ لیک ته د ایران رسمي ځواب لاهم له امریکا سره غیر مستقیم مذاکرات دي.
د اسراییل د لومړي وزیر دفتر خبر ورکړ چې د غزې له تړانګې څخه د اشدود او اشکلون پر ښارونو د لسو راکټونو له توغولو وروسته بنیامین نتنیاهو واشنګټن ته د الوتنې پر مهال د دفاع وزیر یسرایل کاټز ته د ټلیفون له لارې امر کړی، چې دې بریدونو ته "سخت" ځواب ورکړي.
په دغه ټلیفوني خبرو کې نتنیاهو په غزه کې د حماس پرضد د پراخو پوځي عملیاتو په دوام ټینګار وکړ.
تر دې مخکې د حماس پوځي څانګې عزالدین القسام اعلان کړی و، چې د اسراییل په سوېل کې یې پر اشدود او اشکلون باندې راکټي بریدونه کړي دي.
له دغه برید وروسته د اسراییل پوځ اعلان وکړ، چې له لسو توغول شویو راکټونو څخه پنځه یې شنډ کړای شول او یو راکټ یې په اشکلون ولګېد، چې له امله یې یو کس ژوبل شوی دی.
الجزیرې راپور ورکړی، چې په تېرو ۲۴ ساعتونو کې په غزه کې د اسراییل په بریدونو کې لږ تر لږه ۴۶ کسان وژل شوي دي.
له هغه وخته چې اسراییل (د مارچ په ۱۸مه) د اوربند تړون مات کړ؛ د دغه هېواد په بریدونو کې لږ تر لږه ۱۳۰۹ کسان وژل شوي او ۳۱۸۴ نور ټپیان شوي دي.
د روغتیایي ادارو د شمېرو له مخې، د ۲۰۲۳ کال د اکټوبر له ۷مې راهیسې په فلسطین کې د وژل شویو کسانو شمېره له ۵۰زرو اوښتې ده.
په تېرو ۱۲ ساعتونو کې تر ټولو ډېر بریدونه په خان یونس کې شوي دي، چې د ښځو او ماشومانو په ګډون پکې لږ تر لږه ۱۹ فلسطینیان وژل شوي دي.
دا په داسې حال کې ده، چې په غزه کې د ملګرو ملتونو د مرستو او کار ادارې څو ورځې مخکې وویل، چې په غزه کې د جګړې له امله هره ورځ لږ تر لږه د ۱۰۰ ماشومانو د وژل کېدو یا ټپي کېدو راپورونه ترلاسه کوي.
دغه اداره وايي، جګړې په غزه کې د ځوانانو او ماشومانو راتلونکی له ګواښ سره مخ کړی دی.
د میانمار دولتي رسنیو د یکشنبې په ورځ راپور ورکړ، چې په دغه هېواد کې د یوې سختې زلزلې له امله د مړو شمیره ۳۴۷۱ ته ورسېده، خو لا هم د لټون او ژغورنې ډلې د نورو جسدونو موندلو ته دوام ورکوي.
په میانمار کې د ۷.۷ درجې زلزله چې د مارچ په ۲۸مه وشوه، له څلورنیم زره څخه زیات کسان ټپیان کړي هم دي او تراوسه ۲۱۴ کسان لا هم نادرکه دي.
د ملګرو ملتونو لوړپوړي مرستندویه چارواکي ټام فلیچر چې د زلزلې مرکز ته څېرمه د منډالې په مرکزي ښار کې د قربانیانو سره کتل، وضعیت "حیرانونکی" وباله او له نړۍوالې ټولنې یې وغوښتل چې "د میانمار د خلکو تر څنګ ودرېږي."
مرستندویه ډلې وېره لري، چې غیر موسمي بارانونه او سخته تودوخه کولی شي د کولرا په ګډون د نورو ناروغیو د خپرېدو لامل شي.
فلیچر په اېکس لیکلي: "کورنۍ د خپلو کورونو له کنډوالو بهر خوب کوي په داسې حال کې چې د دوی د عزیزانو جسدونه له خاورو را اېستل کېږي. د لا زیاتو زلزلو اصلي وېره شته،"
په عین وخت کې د یانګون - منډالي اورګاډي لاین او د منډالي نړۍوال هوایی ډګر د زلزلې له امله زیانمن او تړل شوی دی.
زلزلې د یانګون - منډالي لاین په اوږدو کې ۶۰ بندونه او د اورګاډي ۱۱ پلونه زیانمن کړي.
په گاونډي هېواد تایلنډ کې د زلزلې له امله د مړو شمېر ۲۴ تنو ته رسېدلی او ۷۷ تنه لادرکه دي.