بلاول بوټو: له ترهګرو ډلو ملاتړ د پاکستان د تاریخ یوه ناخوښه برخه ده
د پاکستان د بهرنیو چارو مخکني وزیر بلاول بوټو زرداري ومنله، چې پاکستان له ترهګرو ډلو او طالبانو ملاتړ کړی. هغه سکای نیوز ته ویلي، دا سمه ده، چې پاکستان به له ترهګرو ډلو ملاتړ کړی وي، خو وايي اوس یې له دغه کاره لاس اخیستی.
ښاغلي زرداري د سکای نیوز له خبریالې یلدا حکیم سره په یوه مرکه کې له ترهګرو ډلو د پاکستان د ملاتړ او د طالبانو له واکمنۍ سره سم کابل کې د ای ایس ای د مشر د شتون په اړه د یوې پوښتنې په ځواب کې وویل: «دا واقعیت زموږ د تاریخ یوه ناخوښه برخه ده.»
خو ښاغلي زرداري ټینګار وکړ، چې هغه هر څه تاریخ کې ثبت شوي او اوس پاکستان داسې څه نه کوي.