روسیې د هند او پاکستان ترمنځ د زیاتېدونکي تاوتریخوالي په اړه اندېښنه ښودلې
د روسیې د بهرنیو چارو وزارت ویلي، چې د هند او پاکستان ترمنځ د زیاتېدونکي پوځي کړکېچ په اړه ژور اندېښمن دي او له دواړو هېوادونو یې غوښتي چې له زغم نه کار واخلي او اختلافات د سولې له لارې حل کړي.
د روسیې دولتي رسنۍ د راپور له مخې، روسیې دغه دریځ د یوې رسمي اعلامیې له لارې څرګند کړی دی. په اعلامیه کې راغلي: «روسیه د ترهګرۍ هر ډول عملونه په کلکه غندي، د هغې پر هر ډول بڼه مخالفت کوي او ټینګار کوي چې د دې شر پر وړاندې باید نړۍواله ټولنه ګډ اقدام وکړي.»
د روسیې د بهرنیو چارو وزارت هیله ښودلې چې د ډیلي او اسلاماباد ترمنځ شته اختلافات د خبرو اترو او سولهییزو لارو حل شي.
اعلامیه زیاتوي:«روسیه د هر ډول دوهاړخیزې حللار ملاتړ کوي.»
روسیه له اوږدې مودې راهیسې د هند یو نږدې متحد بلل کېږي، خو له پاکستان سره یې هم متوازنې او دوستانه اړیکې ساتلې دي.
دا څرګندونې داسې مهال کېږي چې په سیمه کې د دواړو اټومي قدرت لرونکو هېوادونو ترمنځ تاوتریخوالی زیات شوی، او نړۍوالو اندېښنه داده چې ښایي دا وضعیت د پراخې نښتې لامل شي.
دغه اختلافات وروسته له هغه زیات شوي، چې هند د «سندور عملیاتو» په نوم یو پراخ برید پیل کړ، چې د راپورونو له مخې، د پاکستان د پنجاب څلور ځایونه او د پاکستان تر ولکې لاندې کشمیر پنځه سیمې یې په نښه کړې دي.
هند دا عملیات تر خپلې ولکې لاندې کشمیر په پهلګام سیمه کې د یوه ترهګریز برید وروسته پیل کړي، چې پکې ۲۶ تنه وژل شوي وو.