طالبان د کازان په اقتصادي غونډه کې د خپلې ډلې له بیرغ سره ګډون کوي
د طالبانو د ریاست الوزرا اقتصادي معاونیت د ملابرادر د دفتر رییس عبدالله عزام پر خپل اېکس یو انځور خپور کړی، چې د تاتارستان په کازان اقتصادي غونډه کې د نورو هېوادونو بیرغونو په څنګ کې د طالبانو بیرغ هم لیدل کېږي. تمه ده، چې سبا د طالبانو یو پلاوی په دې غونډه کې ګډون وکړي.
دا لومړی ځل دی، چې د روسیې په خودمختاره سیمه تاتارستان کې د کازان په ۱۶م اقتصادي فورم کې د نورو هېوادونو د بیرغونو ترڅنګ د افغانستان د ملي بیرغ پرځای، طالبانو بیرغ لیدل کېږي.
دغه بیرغ داسې مهال د نورو بیرغونو په منځ کې اېښودل کیږي، چې د روسیې د بهرنیو چارو وزارت د وري په ۱۸مه نېټه وویل چې طالبانو ته یې د ترهګرو سازمانونو له نوملړه د وتلو رسمي حیثیت ورکړی.
روسیې دغه اقدام له کابل سره د پوره او رسمي همکارۍ لپاره یو ګام بللی و.
د دغه هېواد د بهرنیو چارو وزارت ویلي و: «دا پرېکړه د روسیې او افغانستان د خلکو په ګټه ده. موږ غواړو چې له افغانستان سره په نشه یي توکو او ترهګرۍ ضد مبارزه، سوداګرۍ، پانګونې او نورو برخو کې ګټورې اړیکې ولرو».
روسیې همداراز د داعش-خراسان څانګې پر ضد د طالبانو اقداماتو ته هرکلی ویلی دی.
ټاکل شوې، چې سبا د چارشنبې په ورځ د ملا عبدالغني برادر په مشرۍ د طالبانو یو جګپوړی پلاوی روسیې ته سفر وکړي او د تاتارستان په کازان اقتصادي فورم کې برخه واخلي.
طالبان تراوسه پورې هیڅ هېواد په رسمیت نه دي پېژندلي او د افغانستان ملي بیرغ تر اوسه په نړیوالو غونډو او مجالسو کې اېښودل کیږي.