د طالبانو ستره محکمه وایي، په پروان کې د یوې ښځې په ګډون پنځه کسان او کاپیسا کې د دوو ښځو په ګډون ۶ کسان په عام محضر کې په دُرو ووهل شول. دغه کسان د «زنا»، «له کوره تېښتې او نامشروع اړیکو» او «جنسي تېري او لواطت» په تور محکوم او په دُرو وهل شوي.
د دغې محکمې په خبرپاڼه کې چې د پنجشنبې په ورځ یې خپره کړې راغلي، چې پروان کې یې پنځه کسان د «زنا» او کاپیسا کې یې څلور کسان «له کوره تېښتې او نامشروع اړیکو» او دوه نور یې د «جنسي تېري او لواطت» په تور محکوم او په دُرو وهل شوي.
د خبرپاڼې له مخې، د جزا دیوان پروان کې تورن کسان له دوو تر درېو کلونو په تنفیذي بند محکوم کړل او په عام محضر کې ۳۶-۳۶ دُرې ووهل شول.
په کاپیسا کې دوه مجرم کسان په یو کلن بند او ۳۹ دُرو، دوه کسان په شپږ میاشتني بند او ۲۲ دُرو او دوه نور تورن په یوه کال بند او ۳۶ دُرو محکوم او د سیمې د خلکو د سترګو پر وړاندې په دُرو ووهل شول.
دا په داسې حال کې ده، چې طالبانو په بامیان او غزني ولایتونو کې هم د «زنا، غلا، نامشروع اړیکو او لواطت» په تور شپږ کسان د خلکو د سترګو پر وړاندې په دُرو وهلي دي.
