د طالبانو د کورنیو چارو وزارت ځینو کارمندانو افغانستان انټرنشنل ته وویل، چې د روان کال د وري میاشتې معاش یې نهدی اخیستی. هغوی زیاته کړه چې معاشونه هره میاشت په ۲۵مه نېټه ورکول کېږي، خو د غويي میاشتې له پای ته رسېدو سره هم، دوی ته معاش نهدی ورکړل شوی.
دغو کارمندانو د شنبې په ورځ (د غویي ۲۷مه) افغانستان انټرنشنل پښتو ته وویل، چې واک ته د طالبانو له رسېدو سره د دوی معاشونه نامنظم شوي او په میاشتو میاشتو ځنډیږي.
د طالبانو د کورنیو چارو وزارت د پولیسو څو تنو افسرانو وویل، چې د اقتصادي ستونزو له امله د معاشونو ځنډېدلو یې ژوند سخت کړی دی.
یو پولیس افسر وویل، چې د کورنیو چارو وزارت تر اوسه هېڅ قانع کوونکی دلیل نه دی ورکړی چې ولې معاشونه ځنډول کېږي.
دوی همدراز زیاتوي:« کله وايي بودیجه نشته او کله هم داسې بهانې کوي، چې مالیې وزارت په سیسټم کې ستونز ده خو دا د قبول وړ نه ده.»
د طالبانو کورنیو چارو وزارت برحاله کارکوونکو د معلومات له مخې نه یوازې د کورنیو چارو وزارت بلکې د ټولو ادارو کارمندانو ته تروسه د وري میاشتې معاشونه نه دي ورکړل شوي.
طالبانو تروسه په رسمي ډول د وري میاشتې د معاشونو ځنډېدو په تړاو څه نه دي ویلی.
دا نیوکې په داسې حال کې کېږي، چې د طالبانو د مالیې وزارت تېر کال «د کب ۲۸مه» د یوې خبرپاڼې په خپرولو سره وویل چې په دې اونۍ کې به د دولتي کارکوونکو معاشونه ورکړي. مخکې له دې، یو شمېر دولتي کارکوونکو افغانستان انټرنشنل ته ویلي و، چې د طالبانو مالیې وزارت له تېرو دوو میاشتو راهیسې د دوی معاشونه نه دي ورکړي.
په تېر کب کې هم طالبانو ادعا کړې وه چې دولتي کارکوونکو ته به معاشونه پر وخت ورکړل شي، خو د ځینو دولتي کارکوونکو او ښوونکو د نیوکو له مخې، تر اوسه یې معاشونه نه دي ورکړل شوي.
دا لومړی ځل نه دی چې دولتي کارکوونکي د طالبانو له لوري د معاشونو نه ورکولو له امله شکایت کوي. د طالبانو د واکمنېدو راهیسې نه یوازې د دولتي ادارو کارکوونکي، بلکې د دې ډلې سرتېري او ښوونکي هم نیوکې کوي چې معاشونه ورته په خپل وخت نه ورکول کېږي.
