طالبانو له پاکستان نه په راتلونکي موټر کې چاودېدونکي توکي نیولي
طالبان وايي، چې د خوست د ګمرک کارکوونکو له پاکستان نه په یوه وارداتي موټر کې یوه اندازه چاودېدونکي توکي کشف او نیولي دي.
طالبان وايي، چې د خوست د ګمرک کارکوونکو له پاکستان نه په یوه وارداتي موټر کې یوه اندازه چاودېدونکي توکي کشف او نیولي دي.
د طالبانو مرستیال ویاند د دوشنبې په ورځ، د غويي پر ۲۹مه، پر خپل اېکس ولیکل، چې دغه موټر په خوست ګمرک کې په نښه شوی او توکي یې نیول شوي.
په نیول شویو چاودېدونکو توکو کې شاوخوا ۲۷۰ کیلوګرامه باروت، سل کڅوړې ثانیه سوز، ۳۶ کڅوړې پټاکۍ او نور چاودېدونکي مواد شامل دي، چې طالبان وايي، «په ډېر ماهرانه ډول د ګلګل په بایلرونو کې ځای پر ځای شوي وو».
نیول شوي توکي او تورن کسان د پلټنو لپاره د طالبانو امنیتي ادارو ته سپارل شوي دي.
په نورستان ولایت کې د یوې نوې ولسوالۍ د مرکز د ټاکلو پر سر د طالبانو ولایتي مشران له داخلي اختلاف سره مخ دي او د وایګل ولسوالۍ یو شمېر خلکو په دې وروستیو کې د والي خلاف لاریون کړی.
د نورستان ولایت یو شمېر اوسېدونکو په وروستیو ورځو کې د طالبانو له لوري د اداري حدودو د وېش او د نوې جوړېدونکې «وایګل» ولسوالۍ لپاره د مرکز ټاکلو پر پرېکړې پراخ اعتراضونه کړي دي.
د طالبانو د والي قاري زینالعابدین عابد په مشرۍ د اداري جوړښت له مخې، موجوده «وانت وایګل» ولسوالي به په دوو جلا واحدونو ووېشل شي. یوه به د «وانټ» په نوم پاتې شي او بله نوې ولسوالي به د «وایګل» په نوم رامنځته شي.
د دغه پلان تر ټولو جنجالي برخه د وایګل ولسوالۍ لپاره د نوي مرکز انتخاب دی، چې د سیمې د بېلابېلو قومونو مخالفت یې راپارولی.
افغانستان انټرنشنل ته رسېدلې ویډیوګانې ښيي چې لاریون کوونکو د طالبانو بیرغونه پورته کړي او د «الله اکبر» شعارونه ورکوي.
یو لاریونوال په خپلو خبرو کې وايي، چې « ځینو مغرضو اشخاصو د شخصي انډیوالۍ په پاللو سره ددې ولسوالۍ قومونو ته په نه پام، درې قومونه پرېښودل او وایګل ولسوالۍ یې له پخواني ځای څخه وړله، دا هېڅ قوم ته د منلو وړ نه دي.»
لاریونوالو ګواښ کړی، چې د دوی پرلت به تر هغه ادامه لري چې د طالبانو د مشر ملاهبت الله د فرمان پر اساس د ولسوالۍ مرکز د قومونو په مشوره انتخاب شي.
لاریون کوونکو، چې د څلورو قومونو مشرانو او خلکو پکې حضور درلود، د وایګل او پارون - کونړ ترمنځ غځېدلی سړک هم بند کړی و.
د سیمه ییزو سرچینو په وینا، د دارنس سیمې خلک د طالبانو د والي له پرېکړې سره مخالف دي، چې له وایګل سیمې څخه یوه سیمه د دې ولسوالۍ د مرکز په توګه غوره کړي او دا کار د سیمې د قومونو ترمنځ اختلاف پاروونکی بولي.
پر عامو خلکو سربېره، د نورستان طالب چارواکي هم د ولسوالۍ د مرکز پر سر اختلاف لري.
راپورونه وايي، چې په نورستان کې د طالبانو امنیه قوماندان د لاریون کوونکو پلویتوب کوي او د ولسوالۍ د مرکز لپاره د والي د انتخاب مخالف دی.
تر اوسه طالب چارواکو د دغه لاریون او ناندریو په اړه کوم غبرګون نه دی ښودلی.
دوه کاله وړاندې د طالبانو د کورنیو چارو وزارت اعلان وکړ چې په ۱۲ ولایتونو کې یې ۲۷ نوې ولسوالۍ جوړې کړې دي.
د طالبانو تر واک لاندې د باختر اژانس هغه وخت لیکلي ول، چې دغه ولسوالۍ د طالبانو تر واک لاندې د هلمند، بغلان، فارياب، فراه، سرپل، غور، بادغيس، پکتيکا، زابل، نورستان او کندهار په ولايتونو کې جوړې شوې دي.
تر دې وړاندې افغانستان ۳۶۴ ولسوالۍ درلودې.
د جرمني سرحدي پولیسو ددوشنبې په شپه په ګرامبو سیمه کې د پنځو افغانانو یوه ډله نیولې او بېرته یې پولنډ ته استولې ده. د جرمني رسنیو د رپوټ له مخې، په دې پنځو تنو کې څلورو تنو پر خپلو افغان پاسپورټونو د روسیې ویزې درلودې او یو تن یې له ځان سره پاسپورټ او سفري اسناد نه لرل.
د جرمني نوي حکومت له پولنډ سره پر پوله خپل سرحدي کنټرول سخت کړی او د هغو کډوالو مخنیوی کوي، چې په غیر قانوني ډول دغه هېواد ته داخلیږي.
د جرمني فدرالي پولیسو په مکلنبورګ-فورپومرن ایالت کې د جرمني-پولنډ پر پوله د ۱۱ کسانو د ناقانونه ننوتلو مخنیوی کړی.
د فدرالي پولیسو په وینا، دغو کسانو جرمني ته د داخلېدو دلیل «ښه ژوند» ښودلی.
په دوی کې درې تنه اریتریایان، چې عمرونه یې د ۲۲ او ۲۵ کلونو ترمنځ وو، هم له پولې بېرته اړول شوي، خو یو نابالغ ماشوم د ماشومانو د ساتنې ادارې ته سپارل شوی دی.
په ورته وخت کې د ملګرو ملتونو د کډوالو عالي کمېشنرۍ استازې کاترینا توټه وايي، چې د جرمني پر پولو د پناهغوښتونکو د بېرته شړلو له امله ژوره اندېښمنه ده.
نوموړې وايي، دا ډول اقدامات د ځنځیري ردونو احتمال رامنځته کوي. هغې ټینګار کړی چې باید د هر فرد د پناه غوښتنې حق خوندي شي، چې دا د نړیوالو کډوالو د ساتنې سیستم بنسټیز اصل دی.
هغې د اروپايي اتحادیې له لوري د تېر کال د ګډ اروپایي پناه ورکولو سیستم ته اشاره کړې، چې هدف یې د پناهغوښتونکو عادلانه وېش دی. نوموړې له اروپایي هېوادونو وغوښتل چې د سختیو او مخنیوي پرځای پر همدې تمرکز وکړي.
د ننګرهار ولایت د رسنیو مرکز وايي چې په جلال اباد ښار کې د ګلبهار خیریه بنسټ له لوري بېرته راستنو شویو هېوادوالو ته د کاروبار په موخه د کډوالو په نوم بازار پرانېستل شوی. په ننګرهار کې طالب چارواکي وايي چې د ملاهبت الله د حکم له مخې به کډوالو ته اسانتیاوې رامنځته کوي.
د طالبانو د ننګرهار ولایت مقام د رسنیو مرکز نن دوشنبه، د غويي ۲۹مه په اېکسپاڼه کې د یوې خبرپاڼې په خپرولو سره لیکلي چې د ننګرهار مرکز جلالابا ښار کې د ګلبهار خيريه بنسټ له لوري بېرته راستنو شويو افغانانو ته د کاروبار په موخه د کډوالو په نوم د بازار پرانيسته شوې.
د يادې پرانیستې پر مهال د طالبانو د ننګرهار ولایت مقام مالي او تاميناتي ریيس احمد حمزه له ګبهار خيريه بنسټ مننه کړې، چې راستنو شويو کډوالو لپاره يې د کډوالوبازار پرانیست او دوی ته يې پکې د کاروبار زمينه برابره کړه.
نوموړي ویلي: «راستنې شوې کورنۍ زموږ خپل افغانان او ورونه دي، پر حکومت او ولس يې حق دی چې د کاروبار، ژوند او ټولو برخو کې ور سره مرسته او همکاري وکړو.»
یاد طالب چارواکي له نورو خيره بنسټونو،پانګوالواو سوداګرو هم غوښتي چې دګلبهار خيريه بنسټ په څېر ابتکار وکړي اوراستنوشویو هېوادوالوسره د کار په موندنه اوجوړونه کې همکاري وکړي.
د ننګرهار ولایت لپاره د طالبانو د کار ټولنيزو چارو ریيس فريدالله حقاني ویلي، چې د ملاهبت الله د حکم تطبيق په موخه به راستنو شويو هېوادوالو ته «لازم سهولتونه او کاري فرصتونه رامنځته شي».
حقاني زیاته کړې، چې اوسمهال په دې بازار کې يولس تنو ته د جامو، بوټانو او نورو توکو او وسايلو دوکانونه جوړ شوي، چې په راتلونکې کې به نورو راستنو شويو هېوادوالو ته هم د کار زمينه برابره شي.
د ګلبهار خيريه بنسټ مشر الیاس توتاخېل ژمنه کړې، چې نورو راستنو شویو هېوادوالو ته به هم د کار زمينه برابره کړي.
په امریکا کې افغان پادري «کشیش» بهنام رسولي خبرداری ورکړی، که افغان عیسویان افغانستان ته ستانه شي؛ نو د مرګ له ګواښ سره به مخ شي.
بهنام رسولي فاکس نیوز سره په مرکه کې وویل:« که چېرته له دغه افغان عیسویانو څخه کوم یو افغانستان ته ستون شي؛ نو لومړی کار چې پېښېږي هغه دا دی، چې مېړونه به یې ووژل شي او ښځې به یې د جنسي غلامانو په توګه وساتل شي.»
هغه زیاته کړه:« که طالبان یې ونه وژني؛ نو په زندان کې به یې واچوي او هره شېبه به یې شکنجه کوي.»
د امریکا د کورني امنیت وزارت څو ورځې وړاندې په رسمي توګه د افغان وګړو لپاره د لنډمهاله خوندیتوب پروګرام لغوه کړ، چې له مخې به یې له ۹۰۰۰ څخه ډېر خلک د طالبانو تر کنټرول لاندې افغانستان ته د ستنېدو لپاره اړ شي.
د امریکا د کورني امنیت وزیرې کرېسټي نوم د دغې پرېکړې لامل په افغانستان کې «ښه امنیتي شرایط او اقتصادي ثبات» یاد کړ.
خو نیوکه کوونکي بیا وايي، که افغان کډوال د طالبانو تر کنټرول لاندې افغانستان ته واستول شي؛ نو د مرګ په ګډون به د نه جبرانېدونکو ګواښونو سره مخ شي.
له ګواښ سره د مخ کسانو په منځ کې په اوکلاهوما کې افغان عیسویان هم شامل دي، چې ډېری یې په قانوني توګه امریکا ته د رسېدو لپاره له ګواښه ډک سفرونه کړي دي.
بهنام رسولي فاکس نیوز ته د یو شمېر افغان عیسویانو کېسه کړې، چې د هغه په وینا له برازیل څخه تر مکسیکو یې سفر کړی و، پراخې ستونزې او ننګونې یې منلې وې.
هغه وويل:« دوی د اونیو لپاره پرته له خوړو او اوبو وخت تېر کړی؛ خو دوی چمتو وو، چې دغه سختۍ وګالي ترڅو په قانوني ډول متحده ایالاتو ته ننوځي. اوس د نوي حکومت په راتګ سره موږ اورېدلي، چې د دوی د لنډمهاله استوګنې جوازونه لغوه شوي دي. دوی ان د کار کولو اجازه هم نه لري.»
فاکس نیوز ډیجیټل د دغه پادري اندېښنې له سپینې ماڼۍ سره هم شریکې کړې دي.
د سپینې ماڼۍ ویاند کوش ډیسای وایي:« هغه افغانان چې د قانوني استوګنې اسناد نلري او د خوندي لاملونو پر بنسټ له څار څخه وېره لري، کولای شي د پناه غوښتنه وکړي او محکمه به د دوی قضیې په پام کې ونیسي.»
د پاکستان د بهرنیو چارو وزارت خبر ورکړی، چې اسحاق ډار د خپل درې ورځني سفر په ترڅ کې چین ته لاړ. د افغانستان لپاره د پاکستان ځانګړي استازي محمدصادق هم پر اېکس پاڼه کاږلي، چې نوموړی هم په دغه سفر کې د اسحاق ډار ملتیا کوي.
ټاکل شوې ده، چې د طالبانو د بهرنیو چارو وزیر امیر خان متقي سبا د سې شنبې په ورځ (د مئ په ۲۰مه) په دغه درې اړخیزه غونډه کې د ګډون په موخه بېجینګ ته سفر وکړي.
د پاکستاني رسنیو د راپورنو له مخې، د چین د بهرنیو چارو وزیر وانګ یي به د امیر خان متقي او اسحاق ډار سره د درې اړخیزې غونډې کوربهتوب وکړي.
په دغې درې اړخیزه غونډه کې به د سوداګرۍ او امنیتي همکاریو د پراختیا په اړه بحث او نظرونه تبادله شي.
له دې وړاندې (د مئ په ۱۰مه) په کابل کې د افغانستان، پاکستان او چین لومړۍ درې اړخیزه ناسته هم ترسره شوه، چې د دغې ناستې موخه هم سیمهییز ټیکاو او د دغه درېیو هېوادونو ترمنځ د ګډو همکاریو رامنځته کېدل و.
چین، د هند او پاکستانترمنځ په وروستي کړکېچ کې هم له پاکستانه ملاتړ وکړ.
د سیمې ټیکاو لپاره د چین په ناسته کې د طالبانو ور ګډول له هغه وروسته کېږي، چې طالبانو په هند کې د پهلګام پېښه غندلې وه او د دغه هېواد له بهرنیو چارو وزیر جی شنکر سره متقي په خبرو کې د ډیپلوماټيکو اړیکو پر پیاوړتیا او پراختیا خبرې کړې وې.
تر دې وړاندې د طالبانو د بهرنیو چارو وزارت مرستیال ویاند ویلي و، چې د افغانستان لپاره د چین ځانګړي استازي یو شیاویونګ امیر خان متقي ته په روانه میاشت کې چین ته د سفر بلنه ورکړې وه او هغه دغه بلنه منلې وه.