د جرمني سرحدي پولیسو ددوشنبې په شپه په ګرامبو سیمه کې د پنځو افغانانو یوه ډله نیولې او بېرته یې پولنډ ته استولې ده. د جرمني رسنیو د رپوټ له مخې، په دې پنځو تنو کې څلورو تنو پر خپلو افغان پاسپورټونو د روسیې ویزې درلودې او یو تن یې له ځان سره پاسپورټ او سفري اسناد نه لرل.
د جرمني نوي حکومت له پولنډ سره پر پوله خپل سرحدي کنټرول سخت کړی او د هغو کډوالو مخنیوی کوي، چې په غیر قانوني ډول دغه هېواد ته داخلیږي.
د جرمني فدرالي پولیسو په مکلنبورګ-فورپومرن ایالت کې د جرمني-پولنډ پر پوله د ۱۱ کسانو د ناقانونه ننوتلو مخنیوی کړی.
د فدرالي پولیسو په وینا، دغو کسانو جرمني ته د داخلېدو دلیل «ښه ژوند» ښودلی.
په دوی کې درې تنه اریتریایان، چې عمرونه یې د ۲۲ او ۲۵ کلونو ترمنځ وو، هم له پولې بېرته اړول شوي، خو یو نابالغ ماشوم د ماشومانو د ساتنې ادارې ته سپارل شوی دی.
په ورته وخت کې د ملګرو ملتونو د کډوالو عالي کمېشنرۍ استازې کاترینا توټه وايي، چې د جرمني پر پولو د پناهغوښتونکو د بېرته شړلو له امله ژوره اندېښمنه ده.
نوموړې وايي، دا ډول اقدامات د ځنځیري ردونو احتمال رامنځته کوي. هغې ټینګار کړی چې باید د هر فرد د پناه غوښتنې حق خوندي شي، چې دا د نړیوالو کډوالو د ساتنې سیستم بنسټیز اصل دی.
هغې د اروپايي اتحادیې له لوري د تېر کال د ګډ اروپایي پناه ورکولو سیستم ته اشاره کړې، چې هدف یې د پناهغوښتونکو عادلانه وېش دی. نوموړې له اروپایي هېوادونو وغوښتل چې د سختیو او مخنیوي پرځای پر همدې تمرکز وکړي.
