د افغانستان لپاره د کډوالۍ نړۍوال سازمان مشرې مې هیونګ پارک وایي، چې له ایران او پاکستان نه د کډوالو د راستنېدو دویمه څپه پر لاره ده. نوموړې دغه څرګندونې تېره ورځ د اروپایي ټولنې د بشري مرستو په څلورمې ناسته کې کړې دي.
اغلې پارک له ایران او پاکستان نه د ستنېدونکو کډوالو پر وضعیت د اندېښنې په ځرګندولو سره ویلي، چې له پاکستان نه د کډوالو د ستنېدو پرمهال دوی ته د خپلو شتمنیو د پلورلو او لېږد اجازه هم نه ورکول کېږي.
هغه وايي، چې د دوی شتمنۍ په تورخم کې ترې نیول کېږي او کله چې دغه کډوال تش لاس افغانستان ته ستنېږي؛ نو دوی د بې کورۍ او د سرپناه له نشتوالي سره مخ کېږي.
د هغې په وینا؛ له ایران او پاکستان نه ستنېدونکي ګڼ کډوال بې اسناده دي.
نوموړې وایي، له ایران او پاکستان څخه افغانستان ته د افغانانو جبري ستنېدل د هغو کورنیو لپاره ستونزې زیاتوي؛ کومې چې د افغانستان دننه بشري مرستو ته اړتیا لري او په دغه مرستو تکیه کوي.
هغه وایي: «اوسمهال په افغانستان کې یو داسې رژیم واکمن دی، چې په نړۍواله کچه چا په رسمیت نه دی پېژندلی. او هغه وضعیت چې نن په دغه مېز وړاندې شوی، هغه د دغه وضعیت له امله دی.»
