د افغانستان له خبریالانو د ملاتړ سازمان په ډلییزه توګه د ملي راډیو ټلوېزیون د کابو ۳۰۰ کارکوونکو ګوښه کول د اندېښنې وړ بولي او وایي، د طالبانو له خوا دا اقدام د رسنیو د ازادۍ ځپلو او له ټولنیزو ډګرونو په ځانګړي ډول له رسنیو د مېرمنو د سېستماتیک لهمنځه وړلو پر لور یو بل ګام دی.
یاد سازمان د یوې خبرپاڼې په خپرولو سره ویلي، چې په ګوښه کړل شویو کسانو کې داسې خبریالان هم شته، چې د کلونو مسلکي تجربهلرونکي دي او د ملي رسنیو په وده او دوام کې یې مهم رول لوبولی دی.دغه سازمان وایي، چې د یاد شمېر خبریالانو پروړاندې د طالبانو چلند د دې کسانو تجربې او هڅو ته څرګنده بېاحترامي ده او د افغانستان د ازادې اطلاعرسونې راتلونکي ته نه جبرانېدونکی زیان دی.د افغانستان له خبریالانو د ملاتړ سازمان په دې خپره شوې خبرپاڼه کې د ګوښه شویو ښځینه خبریالانو او کارکوونکو په تړاو هم خواشیني څرګنده کړې ده او همداراز زیاتوي: «موږ دا اقدام د ښځو د کار او ټولنیز ژوند له ډګر نه د سېستماتیک ګوښهکېدو تګلارې یوه برخه بولو؛ داسې تګلاره چې له دې وړاندې هم د پوهنې، لوړو زدهکړو، کرنې او نورو دولتي ادارو په چوکاټ کې عملي شوې ده.» یاد سازمان له نړۍوالې ټولنې، د بشري حقونو له بنسټونو او د رسنیو د ازادۍ له ملاتړکوونکو غواړي، چې د سیاسي او ډېپلوماتیکو فشارونو له لارو چارو اقدامات وکړي، ترڅو مسوولان دې ته اړ کړي چې دا خپلسري او غېرمنصفانه ګوښهکېدل، په ځانګړي ډول د ښځو او خبریالانو پر وړاندې پای ته ورسوي.دا په داسې حال کې ده، چې د طالبانو تر واک لاندې ملي راډیو تلویزیون څخه نږدې ۳۰۰ کارکوونکي تنقیص شوي، چې ښځینه کارکوونکې، پخواني خبریالان او د تخنیک د برخې کارکوونکي پکې شامل دي.دا اقدام د طالبانو د رهبرۍ له لوري د دولتي ادارو د لګښتونو د کمولو په موخه د نوې تنقیص پالیسۍ یوه برخه ده.د ملي ټلویزیون یو شمېر کارکوونکو د سې شنبه په ورځ (د غويي ۳۰مه) افغانستان انټرنشنل ته وویل، چې شاوخوا ۳۰۰ کسان چې پکې ۹۰ ښځې دي، تنقیض شوي او کورونو ته رخصت کړای شوي دي.
