په هرات کې د درملو یوه فابریکه په ورځ کې نږدې ۳۰ زره سیرومونه تولیدوي
په هرات ولایت کې د درملو یوه فابریکه په ورځ کې نږدې ۳۰ زره سیرومونه تولیدوي، چې د بازار ۲۰ سلنه اړتیاوې یې پوره کړي دي.
په هرات ولایت کې د درملو یوه فابریکه په ورځ کې نږدې ۳۰ زره سیرومونه تولیدوي، چې د بازار ۲۰ سلنه اړتیاوې یې پوره کړي دي.
د «پارسوا» د درملو د تولید فابریکې مشر محمد رضا عالمي دغه راز زیاتوي، چې یاده فابریکه اوسمهال څه باندې ۳۰ ډوله درمل تولیدوي او ډېر ژر به په دې تولیداتو کې لس قلمه نور درمل هم اضافه شي.
د طالبانو تر واک لاندې باختر خبري اژانس د ښاغلي عالمي له قوله راپور ورکړی، چې په یادې فابریکې شاوخوا یو مېلیون او ۲۵۰ زره ډالره پانګونه شوې ده.
د راپور له مخې، په هرات ولایت کې پر دې فابریکې سربېره د درملو د تولید دولس نور شرکتونه هم فعالیت کوي.
دا په داسې حال کې ده، چې د طالبانو د ریاست الوزرا اقتصادي مرستیال ملا عبدالغني برادر وایي، افغانستان ته وارداتي درمل نه یوازې په لوړه بیه تمامېږي؛ بلکې له هېواده په زیاته کچه د اسعارو د وتلو لامل هم کېږي.
نوموړي د درملو د تولیدي کارخونو له مسوولانو غوښتي، چې له ملي او نړۍوالو معیارونو سره سم درمل تولید کړي.
افغانستان ته تر ډېره د اړتیا وړ درملو لویه برخه له ګاونډیو هېوادونو واردېږي؛ خو نیوکې دا دي، چې دغه هېوادونه افغانستان ته بې کیفیته درمل واردوي.
تر دې وړاندې هم د طالبانو د عامې روغتیا وزارت ویلي و، چې د ملګرو ملتونو پراختیایي پروګرام او د خوړو نړۍوال پروګرام افغانستان ته بې کیفیته توکي وارد کړي دي.
