د روسیې ټلوېزیوني شبکې ار ټي خبر ورکړی چې د شوروي ځواکونو پخوانی سرتېری سرګي کراسنوپېروف بیرته روسیې ته ستون شوی دی. روسي رسنیو د پنجشنبې په ورځ رپوټ ورکړ، چې ۶۰ کلن نورمحمد یا سرګي کراسنوپېروف غواړي په روسیه کې له خپلې کورنۍ سره وویني.
ار ټي وايي، دغه سرتېري په ۱۹۸۵ کال کې له خپلو پوځي ملګرو سره تر لفظي شخړې وروسته پوځي قرارګاه پرېښوده او د افغان وسلهوالو مخالفینو لاس ته ولوېد.
نوموړي وروسته اسلام ومانه، خپل نوم یې بدل کړ او له یوې ځایي افغانې ښځې سره یې واده وکړ چې اوس شپږ ماشومان لري.
نوموړي په افغانستان کې د برېښنا په یوه فابریکه کې کار کاوه او همداراز د سړک جوړونې په چارو کې هم بوخت و.
له دې وړاندې یوه روسي سوداګریز پلاوي له نوموړي سره کتلي وو، چې بېرته یې مسکو ته واستوي.
