العربیه شبکې د یوه باخبره اسرایيلي چارواکي له قوله ویلي، چې د ترکیې په مشرۍ د سوريې حکومت له استازو سره یوه غونډه شوې. دغه چارواکي ويلي: «د احمد شرع په مشرۍ د سوريې حکومت د اسراييل پر وړاندي د ښه نیت نښې ښودلي او سراييل به هم په ورته چلند سره ځواب ورکړي.»
دغه اسراييلي چارواکي په دې ټينګار سره، چې سوریه یو مهم هېواد دی ويلي، چې د اسراییلو سره د اړیکو د عادي کولو لپاره د ابراهیمي تړونونو سره د دمشق یوځای کیدل کولی شي په سیمه کې وضعیت بدل کړي.
هغه زیاته کړه: «اسراییل په سوریه کې پرمختګونه له نږدې څاري او د اسد د پخواني رژیم د حالاتو بیرته ستنیدل نه مني.
العربیه د دغه اسراییلي چارواکي له قوله دا هم وویل، چې امریکا غواړي د سوریې حکومت بریالی شي او په دې برخه کې یې عملي ګامونه پورته کړي دي.
هغه دا هم وویل چې واشنګټن د سوریې په اړه د اسراییلو او ترکیې د هوکړې د بریالیتوب لپاره کار کړی او غوښتنه یې کړې، چې د وضعیت تر روښانه کېدو پورې د اسراییلي ځواکونو تر واک لاندې سیمو څخه هیڅ «تیری کوونکی» اقدام ونه شي.
تر دې وړاندې د امریکا ولسمشر په یوه وینا کې، چې د سعودي عربستان له لوړپوړو چارواکو سره یې کړې وه، هیله وښوده چې سعودي به ډېر ژر د «ابراهیم تړونونه» لاسلیک کړي، چې دا د اسراییل او عربي هېوادونو ترمنځ د اړیکو عاديکولو لړۍ ده.
ډونالډ ټرمپ سعودي عربستان ته د خپل سفر په جریان کې له احمد شرع سره هم ولیدل او له هغه یې وغوښتل، چې د اسراییلو سره د خپل هیواد اړیکې عادي کړي.
