د متحدهایالاتونو د مرکزي استخباراتو ادارې یا سيایاې پخوانۍ مامورې سارا اډمز خبرداری ورکړی چې «افراطي او ترهګرې» ډلې په افغانستان کې روزنه ترلاسه کوي او بیا له دغه هېواده د سومالیا په څېر افریقايي هېوادونو ته لېږدول کېږي.
مېرمن اډمز جمعه د شپې ناوخته (غبرګولي ۲مه) د خپلې اېکسپاڼې له لارې په یوه نوي بیان کې زیاته کړې چې د یمن له لارې د افریقا وچې ته د وسلو، مهماتو او جنګیالیو د لېږد لارې یو وار بیا فعالې شوې دي.
نوموړې پخوانۍ امریکایۍ استخباراتي څېره وايي چې د طالبانو لوړپوړی چارواکی سراجالدین حقاني د افریقا لویې ته د وسلو او جنګیالیو په لېږد کې لاس لري.
هغې همداراز لیکلي، په داسې حال کې چې نړۍ خپل ټول پام په یمن کې د حوثيانو ډلې ته اړولی، خو د طالبانو تر کنټرول لاندې افغانستان کې یې بیا د القاعدې شبکې ترهګریز فعالیتونه له پامه غورځولي دي.
سارا اډمز په افغانستان کې د ترهګرو ډلو فعالیتونو ته په اشارې د نیوکې ترڅنک ټینګار کړی چې په دغه هېواد کې د ترهګرو ډلو مرکزونه ورځ تر بلې په ډېرېدو دي او په وینا یې، دا فعالیتونه یوازې په دفاعي موخو پورې نهشي محدود کېدای.
طالب چارواکو تر اوسه د هغې د څرګندونو په تړاو کوم غبرګون نه دی ښودلی.
د یادونې ده چې د متحدهایالتونو نوموړې استخباراتي مامورې له دې مخکې ویلي و چې سراجالدین حقاني او ابراهیم صدر دواړو د امریکا په خاوره د راتلونکي برید لپاره د چمتووالي په برخه کې له القاعده شبکې سره مرسته کړې ده.
