د طالبانو د امر بالمعروف او شکایتونو اورېدو وزارت وايي، چې په بلخ، کندز، ډایکنډي او لغمان کې یې د کوډګرو «یوه مسلکي» ډله نیولې ده. یاد وزارت پر خپله اېکس پاڼه لیکلي چې د کوډګرو نیول شوې ډلې د دم او تعویذ په نومونو د کورنیو ترمنځ نفاق او ستونزې راولاړولې.
د امر بالمعروف او نهی عن المنکر وزارت محتسبینو د بلخ، کندز، دایکنډي او لغمان ولایتونو کې د اسلامي شریعت خلاف کړنو د مخنیوي او د ښو چارو د پلي کېدو په موخه، ۸ تنه مسلکي جادوګر د کورنیو ترمنځ د نفاق اچولو په تور نیولي، او له څېړنو وروسته یې عدلي او قضايي ارګانونو ته ورپېژندلي دي.
د طالبانو د امر بالمعروف او شکایتونو اورېدو وزارت د شنبې په ورځ (د غبرګولي درېیمه) ویلي چې د کوډګرو دې مسلکي ډلې له عامو خلکو او په ځانګړې توګه له مېرمنو څخه د زیاتو پیسو اخیستلو په بدل کې د کوډو او جادو ناوړه کړنې تر سره کولې.
یاد وزارت ددغو کسانو د هویت په اړه څه نه دي ویلي.
تر دې مخکې یاد وزارت په کابل کې د کوډګرو «یوه خطرناکه» ډله نیولې وه.
یاده دې وي، چې د طالبانو د امر بالمعروف، نهی عن المنکر او شکایتونو اورېدو وزارت د روان کال د غويي پر ۱۰مه ویلي و، چې محتسبانو یې په تېر ۱۴۰۳ کال کې د افغانستان په بېلابېلو ولایتونو کې ۹۵۳ کوډګر نیولي دي.
