روسیې له طالبانو سره د اقلیمي بدلون پر وړاندې د ګډو همکاریو ژمنه تازه کړه
د طالبانو تر واک لاندې د چاپېریال ساتنې ادارې مشر مطيعالحق خالص د “نوسکي نړیوال چاپېریالي کانګرس” په څنډه کې د اقلیمي بدلون په برخه کې د روسیې د بهرنیو چارو وزارت له ځانګړي استازي سره کتلي. دغه لیدنه د اقلیمي بدلون پر وړاندې د دوهاړخیزو همکاریو د پراخولو په موخه ترسره شوې ده.
د طالبانو تر واک لاندې د ملي ټلوېزیون د راپور له مخې، په دې ناسته کې د اقلیمي بدلون په برخه کې د روسیې د بهرنیو چارو وزارت ځانګړي استازي ټینګار وکړ، چې هېواد یې چمتو دی افغانستان ته د اقلیمي بدلون پر وړاندې د مبارزې په برخه کې لازم تخنیکي تجهیزات، زدهکړنیز پروګرامونه او مسلکي تجربو د شریکولو زمینه برابره کړي.
هغه زیاته کړه چې روسیه د افغانستان د چاپېریال د خوندیتوب او دوامداره پرمختګ لپاره اوږدمهاله همکاریو ته ژمنه ده.
له بلې خوا، مطيعالحق خالص د افغانستان لپاره د اقلیمي مبارزې مهمو برخو ته اشاره وکړه، چې پکې د اوبو د سرچینو مدیریت، د ځنګلونو د وهلو مخنیوی او د بېرته نوي کېدونکو انرژیو په برخو کې د همکاریو د پراخېدو غوښتنه کړې ده.
دغه کتنه داسې مهال ترسره کېږي چې افغانستان د اقلیمي بدلون له جدي اغېزو سره مخ دی او د ملي او نړیوالو همکاریو اړتیا ورځ تر بلې زیاتېږي.