یوې پاکستانۍ رسنۍ د باوري سرچینو په حواله راپور ورکړی، چې د خېبر پښتونخوا له ټانک ولسوالۍ څخه له برمته شویو دوو پولیو واکسین ورکوونکو څخه یو یې د قومي مشرانو په ضمانت خوشې شوی دی.
سرچینه زیاتوي، دغه ضمانت په دې شرط شوی چې له دې وروسته به په یاده سیمه کې د پولیو واکسین کمپاین نه ترسره کېږي.
سرچینې د ضمانت د نورو جزئیاتو، یا دا چې د نوموړي د خوشې کېدو لپاره پیسې ورکړل شوې که نه، معلومات نه دي ورکړي.
د سرچینې په وینا، یاد کس د پاکستاني طالبانو اړوند کسانو لهخوا تښتول شوی و.
لا د دویم واکسین ورکوونکي د خوشې کېدو په اړه څه نه دي ویل شوي.
تېره ورځ د پاکستان ډان ورځپاڼې راپور ورکړی، چې د پولیو دغه دوه واکسیناتوران د ډېره اسماعیل خان په ټانک ولسوالۍ کې د ناپېژانده وسلهوالو لهخوا وتښتول شول.
په وروستیو اونیو کې په ټانک ولسوالۍ کې د پولیو پر ضد کمپاین له سختو امنیتي ستونزو سره مخ دی، څو واکسین ورکوونکي په نښه شوي یا برمته شوي دي، چې دا وضعیت د ماشومانو روغتیا ته جدي ګواښ پېښوي.
