څېړنیز راپور؛ د جیش العدل غړو امریکايي سپکو وسلو ته لاسرسی پېدا کړی
د افغانستان انټرنشنل د "جیش العدل؛ څنګه د طالبانو او ایران اړیکې ژورېږي؟" تر سرلیک لاندې څېړنیز راپور کې راغلي، چې د جیش العدل ډلې غړو امریکایي سپکو وسلو ته لاسرسی پیدا کړی دی.
د راپور له مخې، د ایران په سیستان-بلوچستان ولایت کې سیمهییزو چارواکو هم د اسنادو په ښودلو سره دا موضوع تایید کړې او ویلي یې دي چې د جیش العدل وسلهوال په افغانستان کې پاتې امریکایي وسلو ته لاسرسی لري.
راپور زیاتوي، د ۲۰۲۵ کال د جنوري په ۳۰مه د پاکستان د بهرنیو چارو وزارت ویلي و، چې د ۲۰۲۱ کال په اګسټ میاشت کې له افغانستان څخه د امریکايي ځواکونو له وتلو وروسته وسله والو جنګیالیو په پاکستان کې په خپلو بریدونو کې امریکایۍ وسلې کارولې دي.
افغانستان انټرنشنل ته یو شمېر سرچینو تایید کړې ده چې په افغانستان کې د جمهوري دولت د سقوط پر مهال جیش العدل د افغان ځواکونو یو شمېر امریکايي وسلې تر لاسه کړې دي.
په څېړنیز راپور له مخې، د جمهوري دولت پر مهال د فراه د ملي امنیت اپراتیفي مرستیال وايي چې د ۲۰۲۱ کال د اګسټ په درېیمه او څلورمه نېټه یو شمېر سرحدي ځواکونو اته لویې سرحدي پوستې (۱۰۲ عابد، ۲۱۰سرباز، ۴۴۲انتظار، ۹۱۲شاهین، ۳۲۱استحکام، ۲۳ میهن، ۴۱ سارو، ۹۹ رازق) پرېښودې چې ځینې وسلې یې د جیش العدل لاسته لوېدلې دي.
نوموړی ویلي، چې د پوستو له سقوط وروسته دوی معلومات تر لاسه کړل چې یادې وسلې د جنوبي خراسان ماهیرود سیمې ته انتقال شوې وې.
راپور کې راغلي، چې په یادو سرحدي پوستو او قرارګاوو کې ۳۴۲ میله M4، M16، RPG،دهشکې، کلاشینکوفونه او پیکا موجودې وې چې د پوستو له سقوط وروسته یې نېږدې ټوله وسله د جیش العدل د شیخ ضیايي څانګې د سرګروپ دوستین بلوڅ لاس ته ولوېده.
راپور زیاتوي، چې د ۲۰۲۴ کال د جولای په ۲۹ مه نېټه په خاش کې د ایراني ځواکونو له خوا د جیش العدل څلور غړي نیول شوي، چې له یادو غړو سره درې میله M4 هم نیول شوي دي. یو سیمه ییز قوماندان له پېښې وروسته ویلي چې د جیش العدل له غړو سره امریکايي وسلې وې.
همدا راز حال وش د ۲۰۲۵ کال د فبروري په ۶مه د جیش العدل د ډلې یوه ویډیو خپره کړې چې پکې د دغې ډلې له یو شمېر غړو سره امریکايي وسلې لیدل کیږي.