طالبانو د ۸ ولایتونو په صنعتي پارکونو کې د ۵۰۰ جریبه ځمکې اسناد صنعتکارانو ته ورکړل
د طالبانو د صنعت او سوداګرۍ وزارت وایي، د اته ولایتونو په صنعتي پارکونو کې یې د لومړي ځل لپاره د ۵۰۰ جریبه څخه زیاته صنعتي ځمکه د ملکیت په ډول صنعتکارانو ته وسپارله.
یاد وزارت د چهارشنبې په ورځ (د غبرګولي ۷مه) د یوې خبرپاڼې په خپرولو سره د دې کار موخه د هېواد صنعتي ودې ته زمینه برابرول، د کارموندنې فرصتونه رامنځته کول او راستنو شویو پانګوالو ته د فعالیت اسانتیاوې برابرول په ګوته کړي.
د یادې غونډې په ترڅ کې، چې د صنعت او سوداګرۍ وزارت په تالار کې جوړه شوې وه، ۹۱شرکتونو ته چې د صنعتي ساحو لپاره یې د ځمکې غوښتنه کړې وه او همداراز ۹ تنو راستنو شویو افغان صنعتکارانو او سوداګرو ته د ملکیت اسناد ورکړل شول. ټولټال ۵۱۸.۷۷۴۵ جریبه ځمکه د ملکیت په توګه ووېشل شوه.
په دې غونډه کې د رییسالوزرا اقتصادي مرستیال الحاج ملا عبدالغني برادرپه ګډون د طالبانو نور لوړپوړو چارواکو هم ګډون درلود.
ملا عبدالغني برادر وویل: «د صنعت ودې ته جدي پاملرنه کېږي او د امیرالمومنین حفظهالله لهخوا د صنعتي ساحو د قانون توشیح د دې کار رسمي ملاتړ ښيي.» نوموړي زیاته کړه چې دا بهیر به نه یوازې د صنعت پرمختګ ته زمینه برابره کړي، بلکې په هېواد کې د بېکارۍ ستونزه به هم راکمه کړي.
هغه د بهر مېشتو افغان پانګوالو څخه غوښتنه وکړه چې خپلې پانګې افغانستان ته راواړوي او خپلې تجربې له کورنیو پانګوالو سره شریکې کړي.
د هرات ولایت څلورمه صنعتي حوزه، د قندهار شوراندام، د میدان وردک کوتل تخت، د پروان باریکاب، د لوګر محمداغه، د خوست باغ سماوار، د ننګرهار شیخمصری او د هلمند دوراهي صنعتي پارکونو کې د صنعتکارانو لپاره د ځمکو ملکیت اسناد رسماً وسپارل شول.