افغانه پاراتکواندو لوبغاړې ذکیه خدادادي وتوانېده چې د برازیل په ریو ښار کې د «ریو اوپن جي۲» نړیوالو سیالیو کې د برونز مډال خپل کړي. نوموړې دا بری د پنجشنبې په ورځ د یوه انسټاګرام پیغام له لارې له خلکو سره شریک کړی.
هغې ویلي، « دا مډال یوازې زما نه دی، دا د ټولو هغو افغان ښځو لپاره دی چې له ټولو ستونزو سره سره، لا هم ولاړې دي».
خدادادي زیاته کړه: « کېدای شي له خنډونو سره مخ شو، خو هېڅکله به تسلیم نه شو. موږ به بېرته راپورته کېږو».
ذکیه خدادادي د طالبانو له بیا واکمنېدو وروسته له افغانستان څخه ووتله او اوس مهال په فرانسه کې ژوند کوي.
هغې له دې مخکې هم د ۲۰۲۴ کال د پاریس پارالمپیک سیالیو کې د کډوالو د نړیوال ټیم په استازیتوب ګډون کړی و او هلته یې هم د برونز مډال وګاټه. دا د کډوالو نړیوال ټیم لپاره په المپیک کې لومړنی تاریخي مډال و.
ذکیه اوس په خپلې نوې لاسته راوړنې سره د افغان ښځو د ځواک، نه تسلیمېدو او الهام بښنې نښه ګرځېدلې ده ، په ځانګړې توګه د هغو ښځو لپاره چې د طالبانو تر واک لاندې، له ورزش، زده کړو او ټولنیز ژوند څخه محرومې پاتې دي.
