فضلي: د غزې اوسنی وضعیت د جلالاباد درې نیمې لسیزې پخوانۍ محاصرې ته ورته دی
د مخکني جمهوري نظام د چارو ادارې پخواني رییس فضل محمود فضلي د افغانستان تېر، اوسني او راتلونکي سیاست ته په اشارې سره ویلي، که خپلواک ونه اوسو د افرادو په توګه به د نیابتي ډلو د ستاینو او غندلو په ګرداب کې له منځه ولاړ شو.
نوموړي د جمعې په ورځ په خپل اېکس پاڼې لیکلي، که افغانستان اوسمهال ملي دولت نه لري، خو د سیاسي سازمانونو د جوړېدو لپاره زمینه برابره ده او د دې پر ځای چې هره ورځ پر خبرې سرلیکونو غبرګون وښیو پکاره ده، چې له خپل نږدې فکرې ملګرو سره دوامداره سیاسي بحثونه او ډیالوګونو ته زمینه برابره کړو.
نوموړي ټینګار کړی، چې د افغانستان لپاره دې داسې ډیالوګ جووړ شي، چې روښانه پایلې ولري او د سیاسي شبکو او اډیالوژیکو سازمانونو بنسټ او اساس وګرځي؛ داسې سازمانونه چې بهرنۍ بودیجې ونه لري او خپلواک وي.
فضلي په دې لیکنه کې د غزې اوسنۍ وضعیت او درې نیمې لسیزې وړاندې د جهادي تنظیمونو له خوا د جلال اباد محاصره پرتله کړې ده.
نوموړی وايي، افغانان دې له تېر څخه زده کړه وکړې او د سیاسي پروسیې له لارې دې پر ژورې سیاسي پوهې تمرکز وکړي.
نوموړي ویلي، کوم وضعیت چې اوس په غزه کې دی، کټ مټ همدا وضعیت په ۱۳۶۷ کال کې د جهادي تنظیمونو له خوا پر جلال اباد حاکم و.
نوموړی وايي، هغه مهال جلال اباد د نننۍ غزې په څېر محاصره و، خواړه او درمل نه وو او هره ورځ د مجاهدینو په راکیټونو کې ملکي کسان وژل کېدل.
د نوموړي په خبره د جلال اباد محاصرې شپږ میاشتې دوام وکړ او دا محاصره یوازې یو نظامي جنګ نه و، بلکې د لویدیځو نیابتي قواوو، رسنیزو تبلیغاتو او بشري ناورینونو یوه ازموینه وه؛ هماغه سناریو نن په غزه کې تکراریږي، خو موږ لا هم د افرادو په تحلیل بوخت یوو، نه د استعمار په کړنلارو.
فضلي ویلي:« نو که موږ غواړو د خپلو غمیزو ریښې وڅېړو، باید تمرکز د افرادو پر ځای د هغو حکمتونو پر سیاستونو وکړو، چې دغه افراد یې استخدام کړي.»
د فضلي په خبره فلسطینیان د بد وضعیت په لرلو سره ملي پوهه لري او د خپل برخلیک پړه په افرادو نه بلکې د لویو قدرتونو په سیاستونو اچوي او اوږده سازماني او ایډیالوژیکه مبارزه کوي.
نوموړوی وايي، افغانان ځکه اوږده، دوامداره او اډیډیالوژیکه مبارزه نه شي کولای، چې په لنډ مهاله پروژو روږدي شوي او د خپل ملت یوې لویې فاجعې ته د بحران د مدیریت، تمویل، پروژو او نورو انجويي مفاهیمو له عینکو ګورو.
فضل محمود فضلي په ټینګار سره ویلي، چې د ۱۳۶۷ په څېر د بلې غمیزې د تکرار د مخنیوي لپاره له احساساتي غبرګونونو دې تېر شي او پر ژوره سیاسي پوه تمرکز وشي؛ هغه پوه چې د سیمې او نړۍ د سیاستونو ماهیت و پېژني او هېواد کې د باثباته سیاسي بهیر پیل تضمین کړي.