په اسلاماباد کې پېژندل شوې ټيک ټاکره ثناء یوسف په ډزو سره وژل شوې ده
د پاکستان په پلازمېنې اسلاماباد کې پېژندل شوې ۱۷ کلنه ټیک ټاکره او یوټیوبره ثناء یوسف د ناپېژندو کسانو له خوا وژل شوې ده. جیونیوز د پولیسو د سرچینو له قوله ویلي، چې دا پېښه د اسلاماباد په تهانه سنبل سیمه کې رامنځته شوې ده.
د پولیسو د معلوماتو له مخې، یاده ټيک ټاکره تر هغه وروسته وژل شوې، چې تورن کس د دوی کور ته ننوتلی او نوموړې یې په مرمیو وېشتلې ده.
پولیس وایي، چې د پېښې په وخت کې ثناء یوسف په کور کې یوازې وه.
د یادولو ده، چې یادې ۱۷ کلنې نجلۍ له وژل کېدو څو ساعته وړاندې په خپل انسټاګرام کې یوه ویډیو هم خپره کړې ده.
دا په داسې حال کې ده، په پاکستان کې ښځينه هنرمندانې او د اوسنیو خواله رسنیو فعالان ډېری وخت د غیرت په نوم وژل کېږي.