د ۲۰۲۵ کال د هند غوره لیګ کرېکټ سیالیو پایلوبه نن سې شنبه د احمداباد ښار په نرېندرا مودي لوبغالي کې تر سره کېږي او پنجاب کینګز او رویال چلنجر لوبډلې د جام ګټلو لپاره خپل بخت ازمايي.
د پنجاب کینګز او رویال چلنجر بنګلور لوبډلې ترمنځ د هند غوره لیګ وروستۍ لوبه نن ماښام ۷:۳۰ بجې د هند په ځايي وخت د احمداباد ښار په نرېندرا مودي لوبغالي کې تر سره کېږي.
دغه دواړه لوبډلې د کرېکټ نړۍ د غوره لوبغاړو په لرلو سره د یاد لیګ په نورو پړاونو کې تر پایلوبې رسېدلي و، خو تراوسه هېڅ یوې لوبډلې د یاد لیګ اتلولي نه ده ګټلې.
شري یاس ایر د پنجاب ګینګز لوبډلې لوبډلمشر دی او په خپل لوبډلمشرۍ کې یې تېرکال د کلکتې لوبډلې لپاره د هند غوره لیګ اتلولي وګټله.
په دغه لوبډله کې د هارنور سېنګ، ششنک او ماکس ټونېس ترڅنګ د افغانستان ملي لوبډلې غوره لوبغاړی عظمت الله عمرزی هم شتون لري.
نوموړي په سږنې ای پي اېل سیالیو کې تر دې مهاله د پنجاب کینګز لوبډلې لپاره د غوره توپ اچونې ترڅنګ د پام وړ توپ وهنه هم ترسره کړې ده.
رویال چلنجر بنګلور لوبډلې هم تر اوسه د هند غوره لیګ سیالیو اتلولي نه ده ګټلې او په یاده لوبډله کې د ویرات کهولي تر څنګ مینک اګروال، ټېم ډېوېډ، کرونال پانډیا، لیام لیوینګسټون سواستیک چیکارا په څېر د نړۍ غوره لوبغاړي شتون لري او نن د پنجاب کینګز لوبډلې په وړاندې د اتلولۍ جام ګټلو لپاره خپل بخت ازمايي.
که څه هم د سږني ای پی اېل سیالیو په ګروپي پړاو کې دواړو لوبډلو خورا د پام وړ لوبې نندارې ته وړاندې کړې، خو د کرېکټ تبصره کوونکي وايي چې د پایلوبې ګټلو په اړه ورته وړاندوینه سخته ده.