خالد حنفي: په «اسلام» کې د چا پر شخصي حریم د تېري اجازه نشته
د طالبانو د امر بالمعروف او نهې عن المنکر وزارت وزیر خالد حنفي وایي، چې په دین کې د چا پر شخصي حریم د تېري اجازه نشته. دغه وزارت پر اېکس پاڼه د ښاغلي حنفي په حواله لیکلي، چا ته هم اجازه نشته، چې د خلکو ګرځنده ټیلیفونو، جېبونو او کورنو کې د اجازې پرته لاسوهنه وکړي.
خالد حنفي په داسې حال د شخصي حریم د خوندیتوب خبرې کوي، چې هر ورځ په افغانستان کې د امر بالمعروف محتسبین په لارو او کوڅو کې د عامه خلکو موبایلونه پلټي او ځوانانو ته د هغو د ظاهري بڼې له امله سپکاوی کوي.
د یادولو وړ ده، چې په افغانستان کې واک ته د طالبانو له رسېدو وروسته هر ورځ د دغه ډلې وسلهوال د عامه خلکو کورونه د هغوی له اجازې پرته پلټي او دا کار د خپل ځان لپاره د یوه جواز په توګه ګني.