د سپینې ماڼۍ ویانده کارولین لیویټ وایي، چې امریکا ایران ته ډېر ښه او د منلو وړ وړاندیز کړی او نوموړې خبرداری ورکوي: «که ایران د امریکا دغه وړاندیز و نه مني، نو له جدي پایلو سره به مخ شي او دا هغه څه دي چې ولسمشر په ځلونو پرې ټینګار کړی دی.»
لویټ د هغې پوښتنې له ځوابولو ډډه وکړه، چې ګواکې امریکا ایران ته داسې وړاندیز کړی چې له مخې یې ایران کولی شي د ټیټې کچې یورانیم بډایه کړي، خو ویې ویل: «موږ د رسنیو له لارې مذاکرات نه کوو. دا پرېکړه د روانو خبرو اترو او مذاکراتو د درناوي لپاره شوې، چې د ځانګړي استازي ښاغلي ویتکاف له لوري رهبري کېږي.»
لویټ زیاته کړه، ډونالډ ټرمپ هیله لري چې د تهران دا وړاندیز ومني.
دا په داسې حال کې ده، چې وال سټریټ ژورنال د یو لوړ پوړي امریکایي چارواکي په حواله راپور ورکړی، چې متحده ایالات چمتووالی نیسي چې ایران ته یوه داسې «شرط پاڼه» وړاندې کړي، چې په کې د یورانیمو غني کول پای ته ورسېږي.
د امریکا دغه چارواکي وویل، چې که د ایران حکومت داسې شرطونه ونه مني، «دا به د ایرانیانو لپاره بدې پایلې ولري.»
