د امریکا ولسمشر ډونالډ ټرمپ د یوه اجراییوي فرمانپه لاسلیکولو سره د افغانانو په ګډون د ۱۱ هېوادونو پر وګړو د سفر بندیزونه ولګول. د چهارشنبې په ورځ (د جون په ۵مه) د دغه خپاره شوي فرمان له مخې؛ ان کډوال هم نه شي کولای چې امریکا ته داخل شي.
په دغه بندیز کې ایران، چاډ، د کانګو جمهوریت، استوايي ګینه، اریتریا، هایټي، میانمار، لېبیا، سومالیا، سوډان او یمن هېوادونه شامل دي.
د ټرمپ د دغه فرمان له مخې؛ د افغانستان په ګډون د یادو هېوادونو وګړي په هر ډول ویزه امریکا ته له سفره منعه شوي دي.
د افغان وګړو د سفر بندیز لامل دا ښوول شوی، چې د طالبانو ډله د امریکا له لوري د ځانګړو نړۍوالو ترهګرو (SDGTs) په نوملړ کې شامله ده.
د امریکا د کورني امنیت او مالیې وزارت له لوري دغه چمتو شوی نوملړ هغه ډلې او کسان په نښه کوي، چې له ترهګریزو فعالیتونو سره تړاو لري.
په دغه نوملړ کې شاملو کسانو یا ډلو باندې سخت اقتصادي بندیزونه لګول کېږي او شتمنۍ یې هم کنګل کېږي.
فرمان زیاتوي، د طالبانو تر واک لاندې افغانستان هېڅ ډول پیاوړې او همکاره مرکزي اداره نه لري چې پاسپورټونه او نور ملکي اسناد صادر کړي.
همدا راز ویل شوي، د افغان وګړو د ارزونې او تصدیق لپاره اوسمهال په افغانستان کې اړینې تګلارې هم نشته.
د دغه فرمان له کبله ۲۰۰ زره هغه افغانان هم اغېزمن کېږي، چې له امریکايي ځواکونو او ادارو سره یې د دندو له کبله امریکا ته د کډوالۍ ژمنې ترلاسه کړې وې.
ټرمپ (د جنورۍ په ۲۰مه) په خپل یوه فرمان کې وار دمخه د کډوالۍ پروسې ځنډولې وې.
په پاکستان کې د امریکایي ادارو او ځواکونو نږدې ۲۵زره متحدین هم له دغه بندیزونه زیانمن بلل کېږي.
د افغانستان په دې ګاونډي هېواد کې مېشت دغه کډوال د پولیسو له لوري د اېستل کېدو له ګواښ سره هم مخ دي.
د امریکایي سناتورانو په ګډون د کډوالو یو شمېر ادارو له ټرمپ غوښتي وو، چې افغانانو ته په دغه بهیر کې معافیت ورکړي؛ خو ښکاري چې هغه دې غوښتنو ته هېڅ ډول پاملرنه نه ده کړې.
په کندهار کې د طالبانو ښاروالۍ په ښار او بازارونو کې پر دېوالونو د دغه ډلې د مشر هبت الله اخوندزاده د ویناوو او پیغامونو د لیکلو چارې پيل کړې. طالب ښاروال عبدالله روحاني وايي، دا هڅه د ښاري ښکلا او د عامه پوهاوي د پياوړتيا په موخه تر سره کېږي.
نوموړي د چهارشنبې په ورځ (د غبرګولي ۱۴مه) ویلي، چې ښار او بازارونو کې يې پر دېوالونو د هبت الله اخوندزاده د ویناوو او پیغامونو د لیکلو چارې پيل کړې دي.
طالبانو پر لویو امنیتي خښتو د دغه پیغامونو ځینې برخې لیکلي دي، چې په دې لیکنو کې قراني ایتونه او حدیثونه هم شامل دي.
افغانستان انټرنشنل ته په لېږل شويو انځورونو کې ښکاري، چې طالبانو پر یوه دېوال لیکلي: «دا نظام د ټولو افغانانو او مسلمانانو دی، ساتنه یې پر ټولو مسلمانانو لازمه ده، لاسونه سره یو کړئ او له اختلافاتو ځانونه او نور مسلمانان وساتئ.»
یادې ډلې بل ځای لیکلي: «په خپل منځ کې امربالمعروف او نهی عن المنکر فریضه مه پرېږدئ، لمونځونه په جماعت کې سره اداء کړئ.»
که څه هم طالبانو د دې لیکونو موخه ښکلا او د عامه پوهاوي پياوړتيا یاده کړې؛ خو د ښاریانو له سختو نیوکو سره مخ شوې او پر دېوالونو د ایتونو لیکل ناسم کار ګڼي.
د کندهار ښار اوسېدونکي وايي، چې طالبانو تر دې وړاندې له ځينو سیمو څخه پر دېوالونو لیکلي پخوانۍ ویناوې، اشعار او ایتونه پاک کړي؛ خو بل لورې یې بیا خپله لیکلي دي.
د ښاروالۍ د ټولنیزو او کلتوري چارو امر وايي، چې دغه پیغامونه د اسلامي ارزښتونو د ساتنې او د خلکو د دیني پوهاوي لپاره ډېر مهم دي او په دې برخه کې به د ښاروالۍ ټول اړوند ریاستونه په ګډه کار وکړي.
طالبانو له خلکو غوښتي: « ټول هېوادوال دې د هبت الله اخوندزاده له لارښوونو څخه پوهاوی ترلاسه کړي او هغه دې د خپل ورځني ژوند برخه وګرځوي.»
د یادونې وړ ده، چې په دغو فرمانونو کې د شریعت د بشپړ تطبیق، د اسلامي حجاب مراعات، د ښځو د محرم پرته سفر نه کول، د اسلامي اخلاقو پياوړتیا او د شرعي مجازاتو تطبیق په اړه ځانګړی ټینګار شوی دی.
په هالنډ کې د افغانستان سفیر اصف رحیمي د پخواني حکومت له هغو ډیپلوماتانو څخه دی، چې له طالبانو سره یې بیعت کړی دی. سرچینې وايي، طالبان د رحیمي په مشرۍ سفارت ته په میاشت کې لږترلږه ۲۰ زره یورو ورکوي.
اصف رحيمي همداراز کابل ته سفر کړی او له طالب چارواکو سره یې د همکارۍ او تعامل څرنګوالي په اړه خبرې کړې دي.
نوموړي په دې اوونۍ کې د سفارت له وېب پاڼې لوګو او د ټولنیزو رسنیو له پاڼو څخه د افغانستان د اسلامي جمهوریت نوم او ملي بیرغ لرې کړی او په دې ټوګه یې یو بل ګام اخیستی، څو د طالبانو له خوا د افغانستان پر سفارت د واک مشروعیت پياوړی کړي.
د جمهوریت له ړنګیدو وروسته د افغانستان ډیپلوماټیکې ادارې له سختو شرایطو سره مخ شول.
ځینو سفارتونو د مالي سرچینو د کمښت او د لګښتونو د نه تمويل له امله خپل فعالیتونه ودرول.
نور سفارتونه بیا د سیاسي دلایلو او د کوربه هېوادونو لکه په امریکا او انګلستان کې د افغانستان سفارتونو د فشار له امله تړلو ته اړ شول.
له دې سره، ځینو نورو سفارتونو بیا د طالبانو له فشار سره - سره هڅه وکړه، چې په بهر کې افغانانو ته خدمات وړاندې کړي؛ خو ځينو سفارتونو له ځنډ پرته د طالبانو بیرغ پورته کړ.
د جمهوري نظام ډیپلوماتان په درېیو ډلو وېشل شوي دي
یوه ډله تر پایه پورې د جمهوري نظام ارزښتونو او قوانینو ته ژمن پاتې شول او په هر ډول شرایطو کې یې له طالبانو سره له همکارۍ څخه انکار وکړ.
دا کسان چې د کوربه هېوادونو او کابل کې د طالبانو د رژیم له زیاتېدونکو فشارونو سره مخ وو، استعفا یې له طالبانو سره پر همکارۍ غوره وبلله.
دویمه ډله هغه کسان دي چې سیاسي پرمختګونه رامنځته شول، خپل شخصي ژوند ته یې لومړیتوب ورکړ او له ډیپلوماتیکې صحنې څخه ووتل.
درېیمه ډله هغه کسان دي، چې د افغانستان سیاسي بدلون یې یو فرصت وګاڼه تر څو له حالاتو ګټه پورته کړي.
ځینو دغو اشخاصو په ډیپلوماتیکو ادارو کې د ګډوډۍ او د مرکزي واک نشتوالي څخه ناسمه ګټه پورته کړه او عامه شتمنۍ یې لوټ کړې.
یو شمېر نورو د خپلې څوکۍ، عاید او مالي سرچینو د ساتلو لپاره او یا هم د قومي یا سیاسي لاملونو له امله له طالبانو سره یو ځای شول.
په هالنډ کې د افغانستان سفیر اصف رحیمي د همدې درېیمې ډلې له کسانو څخه دی.
هغه د جمهوري نظام له لومړنیو سفیرانو څخه و، چې له طالبانو سره یې بیعت وکړ، د هاګ په سفارت کې یې د افغانستان د اسلامي جمهوریت بیرغ ښکته کړ او د جمهوریت نښان او سمبول یې د طالبانو لوګو سره بدل کړ.
اصف رحیمي څوک دی؟
اصف رحیمي د افغانستان په اسلامي جمهوریت کې په مهمو پوستونو کې دنده ترسره کړې.
هغه په پیل کې د ملي پیوستون پروګرام مشر و، بیا د کلیو او پراختیا مرستیال وزیر، د کرنې، اوبو لګولو او مالدارۍ وزیر او د هرات ولایت چې یو ستراتیژیک ولایت و، د والي په توګه دندې تر سره کړي.
د ۲۰۱۹ کال د ټاکنو وروسته پخواني ولسمشر اشرف غني هغه په هالنډ کې د افغانستان سفیر وټاکه.
رحیمي د حزب اسلامي ګوند پخوانی غړی و؛ خو د ۲۰۰۱ کال له تحولاتو وروسته هغه له ګوند څخه ځان لرې کړ او د یوه لوېدیځ پلوه تکنوکرات او بیوروکرات په توګه راڅرګند شو.
د باخبره سرچینو د څرګندونو له مخې، اصف رحیمي له طالبانو سره هېڅ ایدیولوژیک، قومي یا سیاسي تړاو نه درلود او په تېر وخت کې له دې ډلې سره د همکارۍ سابقه هم نه لري.
په هالنډ کې د افغانستان سفارت محدودې اسانتیاوې او مالي سرچینې درلودې او د جمهوري دورې په جریان کې د سفارت د لګښتونو لویه برخه له کابل څخه تمویل کېده.
عموما د سفارتونو عواید له خدماتو لکه د اسنادو تصدیق، د پاسپورټونو صادرول او د واده او زېږون د ثبت له لارې برابرېږي؛ خو د هالنډ سفارت د پاسپورټ د چاپولو توان نه درلود.
په اروپا کې د افغانستان د پاسپورټونو چاپ یوازې د جرمني په بُن کې د قونسلګرۍ له خوا ترسره کېده، چې له همدې امله د هالنډ سفارت عواید ډېر محدود و او د خپلو لګښتونو پوره کولو ته یې وس نه رسېده.
د سرچينو په وینا، د سفارت مياشتني لګښتونه شاوخوا ۳۰ زره یورو دي.
د بهرنیو چارو وزارت یوه پخواني چارواکي ویلي، په بهر کې د افغان سفارتونو او ډیپلوماتیکو ماموریتونو ټول لګښتونه په کال کې د ۵۰ او ۶۰ مېلیون ډالرو ترمنځ وو؛ مګر د دې ادارو عاید یوازې شاوخوا ۱۵ مېلیون ډالر و، يعنې د بوديجې لویه برخه د کابل د مرکزي حکومت له خوا تمویل کېده.
د هالنډ په څېر هېواد کې د سفیر شخصي لګښتونه په اوسط ډول د ۷ تر ۸ زره یورو ترمنځ دي او د یو ډیپلومات لپاره بیا شاوخوا ۵ زره یورو دي.
د سفارت د ودانۍ کرایه هم په میاشت کې شاوخوا ۶ زره یورو وه.
د کابل تر سقوط وروسته د هالنډ سفارت د دې لګښتونو د پوره کولو توان نه درلود.
له همدې امله اصف رحیمي یوازې د اقتصادي دلیلونو له کبله له طالبانو سره بیعت وکړ او سفارت یې دې ډلې ته وسپاره.
د یو تکنوکرات په توګه هغه د افغانستان د واکمنې ډلې سره هېڅ سیاسي یا ایډیالوژیکي تړاو نه درلود، مګر د هغه فرصت طلبانه چلند هغه اړ کړ، چې اساسي قانون او د جمهوري نظام ارزښتونه پرېږدي او له طالبانو سره یوځای شي.
رحیمي څه ترلاسه کړل؟
د باوري سرچینو په وینا، وروسته له هغه چې اصف رحیمي له طالبانو سره بیعت وکړ، دې ډلې په هره میاشت کې له ۲۰ تر ۳۰ زره یورو د هالنډ سفارت د لګښتونو د پوره کولو په ځانګړې توګه د رحیمي د معاش لپاره ورکوي.
د طالبانو سره د همکارۍ له اعلان وروسته رحیمي کابل ته سفر وکړ او د همکارۍ او تعامل د طریقې په اړه یې د طالبانو له چارواکو سره ولیدل.
د دې سفر په جریان کې هغه وتوانېد، چې خپلې شخصي شتمنۍ او ملکیتونه بېرته ترلاسه کړي. په حقیقت کې رحیمي یوازې د شخصي دلایلو لپاره او پرته له کومې سیاسي اجنډا څخه له طالبانو سره یوځای شو.
هالنډ د طالبانو حکومت په رسميت نه پېژني او په دغه هېواد کې د افغانستان سفارت لا هم د اسلامي جمهوریت اړوند ګڼل کېږي، چې د اشرف غني له تلو وروسته یې یوازې نوم پاتې دی.
طالبان هڅه کوي، چې د سفارتونو د واک له لارې په غیر مستقيم ډول د افغانستان د دولت پر پاتې شونو ادارو واک تر لاسه کړي.
دغه ډله کولای شي، چې په راتلونکې کې له خپلو مستقیمو یا غیر مستقیمو اجیرانو له لارې په سفارتونو کې د کوربه هېوادونو له حکومتونو سره لابي یا د فشار د واردولو هڅې وکړي.
په راتلونکي کې دا ډله کولی شي، په دې سفارتونو کې د خپلو مستقیمو او غیر مستقیمو اجنټانو سره کوربه حکومت ته لابي وکړي.
رحیمي د اشرف غني په حکومت کې د یو شمیر نورو لوړپوړو چارواکو په څېر، طالبان د خپلو سیاسي او مالي ګټو لپاره د یوې وسیلې په توګه ګوري.
دا ډول کسان تر هغه وخته د هر سیاسي نظام تابع وي، چې شخصي ګټې یې تامین او دوی ته څوکۍ یا مقام ورکړي.
دا کړنه د پخواني حکومت د سقوط له اصلي لاملونو څخه وه، ځکه چې سیاسي او نظامي کسان د دې پر ځای چې دفاع وکړي له طالبانو سره د وتلو او جوړجاړي لاره غوره کړه.
د دوی لپاره څوکۍ او اقتصادي ګټې مهمې وې، که دا ګټې د لوېدیځ له ملاتړه برخمن حکومت کې وي یا د هیبت الله اخوندزاده تر مشرۍ لاندې رژيم کې.
د اصف رحیمي په څېر خلکو لپاره د اشرف غني او هبت الله حکومتونو سیاسي او مالي جذابیت (کشش) یو شان دی.
رحیمي ویلي، چې د سفارت اړیکې له طالبانو د دې لپاره تنظیم شوي چې د خدماتو ورکړه روانه پاتې شي او د سفارت فعالیت بند نه شي.
خو طالبانو اعلان کړی، چې پرته له څو محدودو استازولیو لکه د افغانستان سفارت په لاهې (هالنډ) کې د نورو استازولیو اسناد او تصدیقونه نه مني.
له دې سره، ډېرو نورو سفارتونو د فعالیتونو د ځنډولو پر ځای له طالبانو سره د نه همکارۍ لاره غوره کړې.
یو دلیل دا دی، چې له طالبانو سره د سفارتونو همکاري نه یوازې دا چې د طالبانو حکومت ته د مشروعیت بڼه ورکوي، بلکې دغې ډلې ته دا زمینه برابروي چې له کوربه هېوادونو سره لابي وکړي او د هغوی ذهنیت بدل کړي.
اوسمهال هېڅ هېواد طالبان په رسميت نه پېژني؛ ځکه چې دا ډله د هېواد د نیمایي نفوس اساسي بشري حقونه تر پښو لاندې کوي او له ترهګرو ډلو سره یې اړیکې نه دي پرې کړي.
د نړۍ د ذهنیت د بدلولو لپاره د طالبانو هڅو کومه پایله نه ده ورکړې.
حقیقت دا دی، چې د یو لړ اساسي حقونو په اړه د افغانستان د تعلیم یافته خلکو مقاومت او ټینګار په طالبانو فشار ساتي او د نړۍ هېوادونه د طالبانو سره د اړیکو د عادي کولو لپاره بهانه نه مومي.
د خوړو نړۍوال پروګرام وايي، چې د خوړو خوندیتوب وضعیت د نسبي ښهوالي سربېره، په افغانستان کې تر ۹.۵ مېلیونو ډېر خلک لاهم د خوړو له جدي کمښت سره مخ دي.
د دغه سازمان د وروستۍ ارزونې پر بنسټ، د ۲۰۲۵ کال له مې تر اکټوبر پورې د افغانستان شاوخوا ۲۱ سلنه نفوس چې ۹.۵ مېلیونه وګړي کېږي، په بحراني یا ډېر ناوړه وضعیت کې دي. له دې جملې نه ۱.۶ مېلیونه خلک په بېړني وضعیت کې او نږدې ۸ مېلیونه نور بیا ډېر ناوړه وضعیت کې دي.
دا په داسې حال کې ده، چې د روان کال په مارچ او اپرېل کې د هغو خلکو شمېر چې بېړنیو خوراکي مرستو ته یې اړتیا لرله، شاوخوا ۱۲.۶ مېلیون ته رسېده.
د خوړو د نړۍوال پروګرام په وینا، د دې پرمختګ اصلي لاملونه د شخړو کمېدل، اقتصادي وده او دوامداره بشري او کرنیزې مرستې دي.
ورته مهال، د خوړو نړۍوال پروګرام خبرداری ورکوي، چې د اقلیم د بدلون، اقتصادي او ټولنیزو ستونزو او د خوړو د خوندیتوب لپاره د بشري مرستو په برخه کې د ۴۰ سلنه کمښت له امله ستونزې کولای شي لاستهراوړنې له ګواښ سره مخ او زیانمنې کورنۍ بېرته ناورین ته اړ کړي.
نوموړي سازمان پر نړۍوالې ټولنې غږ کړی، چې په افغانستان کې د خوړو خوندیتوب د ډاډمنتیا لپاره په دوامداره او سېستماتیک ډول د هڅو ملاتړ وکړي.
د یادونې ده، چې له افغانستان سره د امریکا د مالي مرستو تر کمېدو وروسته، دغه هېواد اوس مهال له یوه پراخ، ژور او دوامداره بشري ناورین سره مخ دی او هېوادوال سملاسي مرستو ته اړتیا لري.
دا په داسې حال کې ده، چې تېره ورځ د ملګرو ملتونو د بشرپاله مرستو د همغږۍ ادارې یا اوچا خبرداری ورکړی و، چې د امریکا متحدهایالاتونو د مالي ملاتړ له دوام پرته به مېلیونونه افغانان له بشرپاله مرستو بېبرخې پاتې شي.
د لوی اختر په مناسبت، د کندهار ښار امنیتي وضعیت تر بل هر وخت سخت شوی او د ښار مهمو دیني، دولتي او عامه ځایونو ته د خلکو تګ راتګ له جدي څارنې او تالاشۍ سره مخ دی. طالبانو هغه جوماتونه او سيمې تر سخت څار لاندې نیولي، چې د اختر لمونځ په کې ادا کېږي.
له کندهار څخه سرچینو افغانستان انټرنشنل ـ پښتو ته د چهارشنبې په ورځ (د غبرګولي ۱۴مه) ویلي، چې له تېرو دوو ورځو څخه په ښار کې ګام پر ګام تالاشۍ کېږي او ګڼه ګوڼه هم زياته شوې.
د سیمې د اوسېدونکو په وینا، سږ کال هم د کندهار په مرکزي عیدګاه کې د طالبانو مشر هبت الله اخوندزاده د اختر د لمانځه امامت کوي او همدغه موضوع د امنیتي تدابیرو د لا سختېدو لامل شوی.
د عیدګاه جومات شاوخوا کوڅې، نږدې ودانۍ او کورونه د طالبانو له خوا تالاشي شوي او څو ورځې مخکې کندهار پوهنتون چې له عیدګاه سره نږدې موقعیت لري رخصت شوی دی.
طالبان سره له دې چې ډېری یې ځانګړې جامې هم نه لري په ملکي جامو کې په تالاشۍ او ګزمو بوخت دي.
سرچينې زياتوي، چې د طالبانو استخباراتي غړي په ملکي جامو کې په عامه ځایونو، د ښار په هوټلونو او د بازارونو په شاوخوا کې ګرځي او د خلکو فعالیتونه له نږدې څاري.
د اختر په مناسبت د کندهار د احتمالي پېښو د مخنیوي او چمتوالي لپاره د طالبانو د امنیه قوماندان مولوي طالب، د دغه ډلې د والي ملاشيرین، د استخباراتو او نورو ادارو تر منځ هم د همغږۍ ناستې شوي دي.
د سرچینو په خبره، د ښار په تلونکو لارو ځانګړې امنیتي کسان ځای پر ځای شوي او ټول وسایط تالاشي کېږي.
د طالباو امنيتي مسوولینو په خپلمنځي ناسته کې ویلي، چې یوازې باید تمرکز د لمانځه پر ځایونو نه، بلکې د ښار عمومي وضعیت ته وشي او د هر ډول ناامنۍ مخه ونیول شي.
د کندهار اوسېدونکي که څه هم د امنیت د ټينګښت او د وسله والو غلاوو د مخنيوي غوښتنه کوي؛ خو د پرله پسې او ګام پر ګام تالاشيو څخه په تنګ شوي دي.
د تېر کوچني اختر پر مهال په مرکزي عیدګاه کې طالبانو درنې وسلې، لکه دومیله چې د هوايي بریدونو د دفع لپاره کارول کېږي، هم ځای پر ځای کړي و.
سږ کال که څه هم په ښکاره اعلان نه دی شوی، خو د ورته ترتیباتو نښې بیا هم لیدل کېږي.
طالبانو لا تر اوسه د لوی اختر لپاره د لمانځه مشخص ځایونه نه دي اعلان کړي؛ خو دغه ډله د اختر د ورځې څخه یوه ورځ مخکې دغه سيمې اعلانوي.
له ۲۰۲۱ وروسته کله چې طالبان بیا پر افغانستان واکمن شول، د کندهار په مرکزي عیدګاه کې د اختر د لمانځه مشري تر ډېره د ملا هبت الله له خوا ترسره کېږي.
له همدې کبله د طالبانو چارواکي د عیدګاه شاوخوا امنیت ته ډېره پاملرنه کوي؛ ځکه تر اوسه دا سیمه د دوی لپاره یو سمبولیک ارزښت لري.
طالبانو په کندهار ښار کې په هټیو او ګرځنده بڼه له تېل پلورنځیو وروسته د سړک سر صرافۍ بندې کړې دي. د صرافۍ دغو کاروباریانو افغانستان انټرنشنل ـ پښتو سره په خبرو کې ویلي، چې طالبانو په دې کار سره د سلګونو کسانو د کاروبار مخه نیولې ده.
د کندهار ښار یو شمېر لاسي او د سړک سر صرافانو افغانستان انټرنشنل ـ پښتو ته ویلي، چې طالبانو په کندهار ښار کې د دوی پر فعالیتونو بندیز لګولی او د جوازونو غوښتنه ترې کوي.
دغه صرافانو ویلي، چې طالبانو د یوه کمپاین له مخې، په تېرو درېیو ورځو کې د کندهار ښار له ټولو سیمو څخه د سړک سر غرفې ټولې کړې او د لاسي صرافۍ کوچنیو کاروباریانو ته یې د کاروبارو د بندولو ګواښ کړی.
په کندهار ښار کې د سړک پر سر د یوې کوچنۍ صرافۍ مسوول د نوم نه ښودلو په شرط افغانستان انټرنشنل ـ پښتو ته وویل:«د شهیدانو پر چوک دلته تر دېرش زیاتی د صرافۍ غرفې دي، موږ دلته ډالر، کالدارې، تومن او نور اسعار تبادله کوو او ترڅنګ یې د موبایل کریډېټ کارټونه هم پلورو، خو دا څو ورځې کیږي، چې طالبان راځي او وايي، غرفې مو ټولې کړئ. هر وخت چې مو جواز واخیست بیا کار شروع کړئ.»
د صرافیو دغه کوچني کاروباریان وايي، چې د طالبانو د یاد اقدام په پایله کې د کندهار ښار د شهیدانو څلور لارې، صرافۍ مارکیټ مخ، مدد څلور لارې، کابل اډه، د ګرشک اډه او نورو ځایونو کې سلګونو کسانو کاروبار باندې بندیز لګول شوی.
د کندهار ښار یو صراف د نوم نه ښودلو په شرط وايي:«موږ په دې کار کې د ورځې له شپږسوه څخه تر زر افغانۍ ګټه ترلاسه کوله، اوس نو بیکاره شوو. طالبان وايي، چې موږ باید د صرافۍ مارکیټ د لویو صرافیو جواز او کارټ ولرو، بیا د فعالیت اجازه لرو.»
دغه صرافان وايي، د طالبانو له خوا د اسعارو د تبادلې لویو مرکزونو ته په ښار کې د د درې کوچنیو او لاسي صرافیو اجازه ورکړل شوې او د پخوا په څېر په ازاده توګه نور کسان د یاد کاروبار اجازه نه لري.
طالبانو څو میاشتې وړاندې هم په کندهار ښار او سپین بولدک ولسوالیو کې پر لاسي او کوچنیو صرافیو بندیز لګولی و.
دا په داسې حال کې ده، چې طالبانو دوه اونۍ وړاندې په کندهار کې له پټرول پمپونو پرته په هټیو او ګرځنده بڼه د تېلو پلور باندې هم بندیز ولګاوه.