د هند لومړي وزیر نریندرا مودي د دغه هېواد تر کنټرول لاندې کشمیر کې د اورګاډي د یوې سترې پروژې د پرانېستلو پرمهال کشمیر د «هند تاج» وباله او وايي، د پهلګام ترهګریز برید به د دې سیمي د پرمختیايي کارونو مخه ونه نیسي.
د هند لومړي وزیر نریندرا مودي نن د دغه هېواد تر کنټرول لاندې کشمیر ته د سفر پرمهال د ۲۷۲ کېلومتره په اوږدوالي د «سرینګر ـ بارامولا» رېل پټلۍ پروژه پرانېسته. د ریل یاده پټلۍ د کشمیر درې ته د هند له اصل برخې سره د وصلېدو لپاره یوه ستراتیژیکه لاسته راوړنه بلل کیږ.ي.
د رېل دغه پټلۍ چې د چناب سیند پر سر تېره شوې د نړۍ تر ټولو لوړه رېل پتلۍ ګنل کیږي.
ندریندرا مودي د یادې پروژې د پرانېستلو پرمهال وویل:«زه به اجازه ورنه کړم، چې د پهلګام ترهګریز برید د جمو او کشمیر پرمختګ ته خنډ شي. د ځوانانو ارمانونه به پوره شي او هر خنډ به لومړی مودي ته مخامخ شي.»
مودي کشمیر ته په خپل دغه سفر کې د اقتصادي ودي، سیاحت او ټولنیز ثبات د پیاوړتیا لپاره د روغتیا، سړکونو، ښاري پرمختګ او طبي پوهنتون جوړولو په برخو کې هم ځیني پروژې پرانېستلي.
د هند لومړي وزیر یو ځل بیا پر پاکستان تور ولګاوه، چې په پهلګام کې یې د «انسانیت او کشمیریت» پر ضد برید کې لاس درلود.
