ملا حسن اخوند: ملایان باید د «اسلامي نظام» ساتنه او دفاع وکړي
د طالبانو رییس الوزرا ملا حسن اخوند ویلي، چې رسنۍ د دوی د نظام ضد تبلیغات کوي او د دغه ډلې اړوند ملایان باید د خپل نظام د ساتنې تر څنګ د دفاع لپاره هم هڅې وکړي. هغه د شنبې په ورځ د (غبرګولي ۱۷مه) په ارګ کې د لوی اختر د لمانځه په مراسمو کې دا څرګندونې کړي دي.
هغه زیاته کړې، رسنۍ د طالبانو لاسته راوړنې کوچنۍ منعکسوي او په اړه یې ناسم قضاوتونه هم کوي. د نوموړي په وینا، د دغه ډلې غړي باید رسنیو ته د دوی د «اسلامي نظام» د څراغ خاموشه کولو اجازه ور نه کړي. د طالبانو دې لوړ پوړي چارواکي په خپله اخریزه وینا کې له له عامو افغانانو غوښتي چې د دوی ملاتړ وکړي.
ملا حسن اخوند همدا راز بهر ته تللیو افغانانو څخه یو ځل بیا غوښتي، څو افغانستان ته ورستانه شي. د اپه داسې حال کې ده چې د طالبانو د واکمنۍ راهیسې میلیونونه افغانان د اقتصادي کړکېچ، مرګونې ګواښونو او سیاسي بې ثباتۍ له کبله د لوېدیځ په ګډون ګاونډیو هېوادونو ته کډوال شوي دي.
همدا راز په ارګ کې د طالبانو د سترې محکمې رییس مولوي عبدالحکیم حقاني هم وینا کړې او ویلي یې دي، چې دنده یو امانت دی او باید په سمه توګه ترسره شي. هغه ټینګار کړی چې دغه ډلې په افغانستان کې «اسلامي قوانینو» په ښه توګه پلي کړي دي. هم مهاله بیا د افغانستان په ګډون د نړۍ په بېلابېلو هېوادونو کې دیني عالمان نیوکې کوي چې د طالبانو ډېری چارې او پرېکړې له «شرعیت سره په ټکر» کې دي.
طالبان نن په داسې حال کې اختر نمانځي چې د مکې او بیت المقدس تر څنګ په یو شمېر نورو اسلامي هېوادونو کې تېره ورځ د اختر لومړۍ ورځ نمانځل شوې ده. د طالبانو دغه پرېکړې په کور دننه سخت غبرګونونه هم راپارولي دي.