منظور پښتین: د خپل قوم د ژغورولو لپاره به هڅې دوامداره ساتو
د پښتون ژغورنې غورځنګ مشر منظور احمد پښتین په فرانکفورټ کې يوې جوړې شوي غونډې ته په انلاین ډول خبرو کې وویل، چې د خپل قوم د ژغورولو لپاره به هڅې جاري ساتي. هغه زیاته کړې، چې د پرلهپسې ظلمونو څخه د خلاصون یوه لار ګډ غږ پورته کول او یووالی دی.
په جرمني کې د پښتون ژغورنې غورځنګ څانګې د شنبې په ورځ (د غبرګولي ۱۷مه) په فرانکفورټ کې د اختر په مناسبت ځانګړي مراسم جوړ کړي و، چې سلګونه افغانان يې ګډونوال و.
دې غونډې ته د دغه غورځنګ مشر منظور پښتین هم وینا کړې او د پښتنو پر يوالي يې ټينګار کړی.
هغه پر پښتنو روان ظلمونه غندلي او د خلاصون یوازینۍ لار یې ګډې هڅې یادي کړي دي.
د دې څانګې مشر میوند یوسفي وایي، چې تل يې د پښتنو د حقونو لپاره غږ پورته کړی او راتلوونکو نسلونو ته یې خپل فرهنګ انتقال کړی.
هغه زياته کړې: «پي ټي اېم او ملګري یې د پښتنو د حقونو د غوښتنې سربېره تل په جلا وطنۍ کې خپلې ملي او کلتوري ورځې په شانداره مراسمو لمانځلي دي او موخه یې له دغه غونډو څخه دا ده، چې خپلو راتلونکو نسلونو ته د خپل هېواد کلتور او فرهنګ ورښیي.»
د غونډې سمبالونکي وايي، په پښتنو سیمو کې د شته ستونزو، ننګونو، طبیعي زېرمو او حل لارو په اړه عملي سیمنار، مشاعره او ژوندۍ موسیقي د مراسم برخې وې.
دوی څو ورځې مخکې هم په دغه هېواد کې د پښتو ملي ورځ لماځلې وه.