د هند د بهرنیو چارو وزیر ایس. جې شنکر خبرداری ورکړی چې هند به د پاکستان په هره برخه کې د ترهګرۍ خلاف غبرګون وښيي. جې شنکر پاکستان تورن کړ، چې ترهګري د دولتي پالیسۍ په توګه کاروي. هغه پولیټیکو ته په مرکه کې وویل، چې هند د پاکستان اته اصلي اډې له کاره غورځولې دي.
د هند د بهرنیو چارو وزیر ایس. جې شنکر د بروکسل په سفر کې، چې له اروپایي اتحادیې سره د لوړې کچې سوداګریزو خبرو لپاره ترسره شوی و، له پولیټیکو سره په مرکه کې وویل، « پاکستان داسې هېواد دی چې ترهګري یې د دولتي پالیسۍ وسیله ګرځولېاو همدا اصلي موضوع ده».
نوموړي د ترهګریزو هڅو پر ضد د خبرداري په توګه ځل بیا ټینګار وکړ چې هند به په ځواب ویلو کې هېڅ ډول تردید و نه کړي.
کله چې له جې شنکر وپوښتل شول چې ایا هغه شرایط لا هم شته چې د تېرې میاشتې د نښتو لامل شول، نوموړي وویل: «که تاسې ترهګرۍ ته ژمنتیا د شخړې سرچینه ګڼئ، نو هو، دا اوس هم شته».
جې شنکر دا هم وویل چې د هند جنګي الوتکو او توغندیو د پاکستان هوایي ځواک ته پراخ زیان رسولی او اسلاماباد یې سولې ته اړ ایستی دی.
په ټولنیزو رسنیو کې خپاره شوي انځورونه ښيي چې د هند او پاکستان په جګړه کې یوه میراج او یوه رافایل الوتکه، چې دواړې فرانسوۍ ساخت دي، ویجاړې شوې دي. امریکایي او فرانسوي چارواکو څو رسنیو ته ویلي چې پاکستان لږ تر لږه یوه فرانسوۍ جنګي الوتکه د چینایي ټکنالوژۍ په وسیله غورځولې ده.
کله چې جې شنکر په دې اړه د وضاحت لپاره تر فشار لاندې راغی، د هند د هوایي ځواک د الوتکو ویجاړېدل یې رد نه کړل، خو ویې ویل چې اړوند چارواکي به په خپل وخت پوره معلومات ورکړي.
هغه زیاته کړه، « تر هغه ځایه چې زه معلومات لرم، رافایل څومره اغېزناکه وه، یا نور سیسټمونه څومره موثر ول ، زما لپاره د شواهدو معیار دا دی چې د پاکستان اړخ ته هوایي ډګرونه ویجاړ او له کاره لوېدلي دي».
نوموړی زیاتوي، « جګړه د مې پر۱۰ مه پای ته ورسېده او دا یوازې د یوه دلیل له امله وه، ځکه موږ د همغې ورځې په سهار د پاکستان ۸ اصلي هوایي اډې وویشتلې او له کاره مو وغورځولې. دا یوازې زما خبرې مه ګڼئ، دا انځورونه د ګوګل له لارې هم موجود دي، هلته تاسې لیدلی شئ چې ځغل لیکه او هنګرونه څومره زیانمن شوي».
پاکستان تازه په غیر رسمي ډول اعلان کړی، چې له چین نه نوې جنګي الوتکې او توغندي پېري او خپله دفاعي بودجه لوړوي.
جې شنکر، چې له اروپایي اتحادیې سره د سوداګریزو خبرو لپاره بروکسل ته تللی و، دا هم وویل چې پاکستان په ښکاره ډول «زرګونه ترهګر روزي» او دا ترهګر پر خپل «جنوبي ګاونډي» ور خوشي کوي.
هغه زیاته کړه، « موږ نه غواړو له دغه حالت سره عادي شو. زموږ پیغام ورته دا دی: که تاسې د اپرېل د برید په څېر وحشیانه کړنې بیا تکرار کړئ، نو ځواب به مو خامخا ووینئ او دا غچ به له ترهګرو سازمانونو او د هغوی له مشرتابه وي، موږ ته دا مهمه نه ده چې هغوی چیرې دي. که هغوی د پاکستان په ژورو برخو کې وي، موږ به هم په پاکستان کې ژور لاړ شو».
