مولوي هبت الله اخوندزاده: بې اعتمادي د بې اطاعتي او بې اطاعتي د اختلافاتو لامل کیږي
د طالبانو مشر ملا هبت الله اخوندزاده د کندهار په یوه دیني سیمینار کې چې د طالبانو د جهادي مدرسو د مسوولینو، استادانو او لوړو زده کړو وزارت سرپرست پکې ګډون کړی و، ویلي، چې بې اعتمادي د بې اطاعتۍ لامل کیږي او بې اطاعتي د اختلافاتوسبب کیږي.
د طالبانو ویاند وايي، چې نوموړي په خپله وینا کې د علماوو د دیني، ټولنیز او سیاسي رول یادونه وکړه او ویې ویل چې هغوی باید د انبیاووور پاتې مسوولیتونه پر مخ یوسي، شریعت نافذ کړي، د خلکو ترمنځ قضا وکړي، منازعات حل کړي او د تعلیم، دعوت او نصیحت له لارې د دین ساتنه وکړي.
د طالبانو مشر زیاته کړې چې د دیني علومو احیا د شریعت اقامه تضمینوي او د خلکو اصلاح هم له علم سره تړلې ده.
هغه له استادانو وغوښتل چې د طالبانو او شاګردانو په تعلیم، تربیه، عقیده او فکر جوړونه کې لا زیات تمرکز وکړي.
نوموړي ټینګار کړی، چې له نورو ادارو سره همکاري ضروري ده او د اعتماد فضا باید پیاوړې وساتل شي.