د ایران د حکومت ویاندې فاطمه مهاجراني ویلي، چې د دغه هېواد پر سپاه او پاسارګاد بانکونو د سایبري برېد له امه د بانکدارۍ په چارو کې ګډوډي رامنځته شوې ده. د ګنجشک درنده په نامه اسراییل ته نږدې یوې هېکرې ډلې د برید مسوولیت منلی.
نوموړې ویلي، چې د سایبري برېد له امله د بانکدارۍ چارې ګډې وډې شوې، خو د خلکو شتمنیو ته هېڅ زیان نه دی رسېدلی.
فاطمه مهاجراني ویلي:« خلک دې ډاډه اوسي، تخنیکي کارپوهان خپل کار ترسره کوي او ډېر ژر به اختلال له منځه ولاړ شي او سیستم به بېرته خپل عادي حالت ته راوګرځي.»
د حکومت ویاندې ژمنه وکړه چې په ای ټې ایم ماشینونو کې د نغدو پیسو د کمښت ستونزه به هم ژر حل شي. نوموړې زیاته کړه «د سړکونو پر سر د تګ راتګ د زیاتوالي له امله، د نغدو پیسو په رسولو کې لږ څه ستونزه رامنځته شوې وه، خو دا موضوع اوس حل کېدونکي ده او ژر به د نغدو پیسو د ترلاسه کولو ستونزه هم حل شي.»
پر همدغه مهال پاسارګاد بانک په یوه اعلامیه کې ډاد ورکړی، چې د ستونزې د ژر تر ژره حل لپاره کوټلي اقدامات روان دي.
د ایران حکومت تر اوسه دا نه ده په ډاګه کړې، چې یاد سایبري برېد د چا له خوا شوی، خو تېره ورځ د ګنجشک درنده په نامه اسراییل ته نږدې یوې ډلې ددغه برید مسوولیت منلی و.
