واشنګټن پوسټ یو غږیز پیغام ترلاسه کړی، چې پکې د اسراییل یو اطلاعاتي مامور د ایران د سپاه پاسداران له یوه قومندان سره ټلیفوني اړیکه کې په فارسي ژبه خبرداری ورکوي: «۱۲ ساعته وخت لرې څو له خپلې کورنۍ سره وتښتې، ګنې زموږ لېست کې یې او له شا رګه هم درته نږدې یو. دا په خلاص غوږ واوره.»
د اسراییل د موساد دغه مامور د سپاه له یاد قومندانه همداراز غوښتي، چې یوه ویډيو ثبت کړي او پکې د ایران له حکومته خپله لاره بېله وښيي او هغه د تېلګرام له لارې ور واستوي.
د واشنګټن پوسټ د خبر له مخې، دغه ډول ټلیفوني اړیکې د ایران له څه باندې ۲۰ نظامي، امنیتي او هسته يي چارواکو سره نیول شوې دي.
ځينې دغه اړیکې په خپله کسانو او ځينې یې بیا له مېرمنو سره نیول شوي او پاتې نورو ته بیا ګواښوونکي لیکونه د کورونو د دروازو تر شا رسول شوي دي.
د واشنګټڼ پوسټ د یوې سرچینې په وینا، دغه ټلیفوني اړیکې یوازې خبرداري نه؛ بلکې د ایران له یو شمېر لوړپوړو چارواکو سره د خبرو پیلامه هم ګڼل کېږي.
