د امریکا سترې محکمې د دوشبنې په ورځ د ټرمپ دولت ته اجازه ورکړه، چې پناه غوښتونکو ته د اعتراض فرصت له ورکړې پرته له خپل هېواد پرته نورو هېوادونو ته واستوي. دغه پرېکړه د کډوالۍ په تړاو د ټرمپ د سختو پالیسیو په برخه کې یوه بله بریا ګڼل کېږي.
تر دې مخکې د بوسټون یوه فډرال قاضي د یوه حکم په صادرولو سره دولت موظف کړی و، چې پناه غوښتونکو ته په درېیم هېواد کې د شکنجې او ګواښونو په تړاو د اندېښنو د بیانولو لپاره فرصت ورکړي؛ خو د دغه هېواد سترې محکمې دغه حکم لغوه کړ.
اوس په دې پرېکړې سره د افغان پناه غوښتونکو په ګډون هغه پناه غوښتونکي چې د دوی لپاره خپل هېوادونه امن نه دي او یا هم تر جدي ګواښ لاندې راځي، له امریکا اېستل کېږي.
د امریکا حکومت اوس باید له یوه بل هېواد سره هم توافق وکړي؛ څو له دغه هېواده اېستل کېدونکي پناه غوښتونکي ومني.
د سترې محکمې دغه پرېکړه هم له ګڼو غبرګونونو سره مخ شوې ده.
قاضي سونیا سوتومایور له دوو نورو لېبرال قاضیانو سره د محکمې دغه اقدام له قضايي واکونو ناوړه استفاده بللې ده.
دغه مساله له هغه ځایه پیل شوه، چې د امریکا دولت غوښتل یو شمېر پناه غوښتونکي یوه نا ارام هېواد سوېلي سوډان ته وشړي.
له دغې پرېکړې وروسته د کډوالو د حقونو اړوند سازمانونو هڅه وکړه، چې له بېلابېلو لارو د دغه اقدام مخنیوی وکړي.
د امریکا دولت ویلي، چې دغه اېستل کېدونکي پناه غوښتونکي درانه جرمونه لکه؛ قتل او وسله والې غلاوې کړي او خپل هېوادونه یې د هغوی منلو ته چمتو نه وو.
دغه پرېکړه هم په داسې حال کې ده، چې یو شمېر هغه هېوادونه چې امریکا غواړي پناه غوښتونکي هلته واستوي لکه؛ سوېلي سوډان او لېبیا له شدیدې نا امنۍ، وسله والو نښتو او په پراخه کچه د بشري حقونو له نقض سره مخ دي.
منتقدین هم خبرداری ورکوي، چې له بشپړې ارزونې پرته د یادې پرېکړې عملي کېدل کولی شي د پناه غوښتونکو ژوند له جدي ګواښ سره مخ کړي.
