د ډالر ارزښت په تېرو دریو کلونو کې تر ټولو ټیټې کچې ته رسېدلی
دا چې د امریکا ولسمشر ډونالډ ټرمپ هڅه کوي د دغه هېواد د مرکزي بانک نوی رییس وټاکي، د دغه راپور له خپریدو وروسته، د ډالر ارزښت د پنجشنبې په ورځ په تېرو دریو کلونو کې تر ټولو ټیټې کچې ته ټیټ شوی.
سربېره پر دې، د نړۍوالو بازارونو ونډو هم په تېرو دریو ورځو کې د دویم ځل لپاره نوی ریکارډ ثبت کړ.
والستریټ ژورنال د پنجشنبې په ورځ راپور ورکړی چې ولسمشر ډونالډ ټرمپ هڅه کوي د راتلونکو میاشتو په ترڅ کې له ټاکلي وخت مخکې، د امریکا مرکزي بانک لپاره نوی مشر وټاکي.
په عمومي ډول، د روان کال له پیل راهیسې د ډالر ارزښت له ۱۰ سلنې زیات راټیټ شوی او که دا لړۍ په راتلونکو ورځو کې هم دوام ومومي، نو دا به د ۱۹۷۰مې لسیزې له پیل راهیسې د کال په لومړۍ نیمايي کې د ډالر د ارزښت تر ټولو ستر کموالی وي.
د اروپا د ونډو بازارونه هم یو ځل بیا لږ څه لوړ شوي دي. دا زیاتوالی د هغو نښو له امله دی چې ښيي د اسراییل او ایران ترمنځ اوربند لا هم دوام لري او د اروپايي اتحادیې مشران له امریکا سره د سوداګریزو تعرفو د خبرو لپاره خپل دریځ ټاکي.
یورو هم په ۰،۶ سلنې زیاتوالي سره ۱،۱۷۳ ډالرو ته رسېدلې، چې دا له ۲۰۲۱ کال راهیسې تر ټولو لوړ ارزښت بلل کېږي.
د یورو معاملهکوونکي د ناټو د چهارشنبې ورځې د ناستې له پایلو هم هیلهمن شوي دي.
په دې ناسته کې د ناټو غړو هېوادونو هوکړه وکړه چې خپل د ناخالص کورني تولید ۵ سلنه دې دفاعي چارو ته ځانګړی کړي؛ له دې ډلې ۳،۵ سلنه به د پوځ او وسلو لپاره وي او ۱،۵ سلنه به د غیرمستقیمو دفاعي تدابیرو لپاره ځانګړې شي.
د اسعارو بازار کې، د سویس فرانک په تېرو لسو کلونو کې خپل تر ټولو لوړ ارزښت ته رسېدلی او د جاپان ین یو ځل بیا پیاوړی شوی، چې ارزښت یې د ډالر په وړاندې ۱۴۴ته رسېدلی.
د ډالر شاخص، چې د ډالر ارزښت د شپږو عمده اسعارو پر وړاندې سنجوي، اوس د ۲۰۲۲ کال د مارچ له میاشتې راهیسې تر ټولو ټيټې کچې ته رسېدلی دی.