د ملګرو ملتونو د ماشومانو څخه د ملاتړ ادارې (یونیسف) د معلوماتو له مخې، په افغانستان کې له هر ۱۰۰۰ ماشومانو څخه تر ۵۷ زیات ماشومان پنځه کلنۍ عمر ته له رسېدو وړاندې خپل ژوند له لاسه ورکوي.
یونیسف زیاتوي، «دا شمېرې په افغانستان کې د ماشومانو د روغتیا او ژوندي پاتې کېدو په برخه کې یوه سخته او اندېښمنوونکې ننګونه ده.»
یاد راپور څرګندوي چې د د روغتیایي خدمتونو نشتون، خوارځواکي، بېوزلي، او ناوریني حالات د ماشومانو د لوړې مړینې اصلي لاملونه دي.
یونیسف او نور نړیوال بنسټونه هڅه کوي تر څو د صحي پاملرنې، واکسیناسیون، او تغذیې خدماتو ته د ټولو ماشومانو لاسرسی زیات کړي.
یادې شمېرې دا څرګندوي چې په افغانستان کې لا هم د ماشومانو د ژغورنې لپاره پراخو هڅو ته اړتیا ده، تر څو دا معصوم ماشومان وژغورل شي او یوه روښانه راتلونکی ولري.
بلخوا طالبانو له یونیسف څخه غوښتي چې روغتونونو او روغتیایي مرکزونو ته د درملو په چمتو کولو او لېږد کې ورسره همکاري وکړي.
څو ورځې وړاندې د طالبانو د عامې روغتیا وزارت څخه په خپره شوې خبرپاڼه کې راغلي وو، چې طالب وزیر مولوي نور جلال جلالي د افغانستان لپاره د یونیسف استازي ډاکټر تاج الدین اوېلا سره په لیدنه کې د همکارۍ د غوښتنې ترڅنګ د روغتیايي خدمتونو د ارزونې په موخه په ګډې څارنې، د روغتیايي کارکوونکو پر ظرفیت لوړونې او د روغتیايي مرکزونو د بیارغونې په اړه خبرې اترې کړې دي.
خبرپاڼه زیاتوي، چې د یونېسف استازي ډاکټر تاج الدین ویلي، هڅه کوي چې د تطبیق کوونکو موسسو له لوري د وړاندې کېدونکو خدمتونو د کیفیت ارزونې په موخه د طالبانو روغتیا وزارت سره په ګډه څارنې کار وکړي.
