قطر راتلونکې اونۍ د افغانستان د دوو کاري ډلو د ناستو کوربه توب کوي
په ملګرو ملتونو کې د قطر دایمي استازولي وايي، چې راتلونکې اونۍ په دوحه کې د افغانستان د مخدره توکو ضد کارډلې درېیمه او د افغان خصوصي سکتور د ملاتړ کارډلې دویمه ناسته ترسره کیږي.
په ملګرو ملتونو کې د قطر دایمي استازولي وايي، چې راتلونکې اونۍ په دوحه کې د افغانستان د مخدره توکو ضد کارډلې درېیمه او د افغان خصوصي سکتور د ملاتړ کارډلې دویمه ناسته ترسره کیږي.
په ملګرو ملتونو کې د قطر دایمي استازې عالیه احمد بن سیف الثاني وايي، چې دغه ناستې د روان میلادي کال د جون له ۳۰مې نه د جولای تر لومړۍ نېټې پورې د دوحې بهیر په چوکاټ کې جوړیږي.
په دغو ناستو کې به د طالبانو د حکومت، د دوحې په بهیر کې ښکېلو هېوادونو او تخنیکي کارپوهو ډلو استازي برخه واخلي.
عالیه احمد بن سیف الثاني وړمه ورځ د ملګرو ملتونو د امنیت شورا په درې میاشتنۍ ناسته کې هم وویل، چې قطر د سولې او ثبات د ټینګښت لپاره د افغانانو د هڅو ملاتړی پاتې کېږي.
قطر څرګنده کړې چې د سیمې او نړۍ له شریکانو سره به همکارۍ ته دوام ورکړي څو په افغانستان کې د سولې بنسټونه ټینګ او د پرمختګ اساسي عناصر پیاوړي شي.
عالیې زیاته کړه چې د قطر دولت د قطر پراختیایي صندوق له لارې د ملګرو ملتونو له ادارو سره په همکارۍ، خپلو بشري مرستو ته دوام ورکوي.
د نوموړې په وینا، دغه مرستې د خوراکي توکو مرسته، د لومړنيو روغتیایي پروګرامونو ملاتړ، زده کړو ته د افغان ماشومانو د لاسرسي ښه کول، بورسونه، د افغان مېرمنو اقتصادي پیاوړتیا، له کړکېچونو سره د هغوی د مقاومت لوړول او د افغان ځوانانو د ظرفیت لوړونې پروګرامونه رانغاړي.
