په سوات کې سېلابونه؛ تر اوسه د ۹ کسانو مړي موندل شوي او ۲۰ ورک دي
د پښتونخوا د بېړنیو پېښو پر وړاندې د چمتووالي ادارې ویلي، چې تر اوسه یې د سېلابونو په اوبو کې د ډوبو شویو ۹ تنو جسدونه موندلي او د شل نورو کسانو د لټون عملیات لا هم دوام لري.
د پښتونخوا د بېړنیو پېښو پر وړاندې د چمتووالي ادارې ویلي، چې تر اوسه یې د سېلابونو په اوبو کې د ډوبو شویو ۹ تنو جسدونه موندلي او د شل نورو کسانو د لټون عملیات لا هم دوام لري.
دغه سېلابونه تېره شپه له سختو اورښتونو وروسته راوتلي دي.
د رسمي معلوماتو له مخې، د سېلابونو د راوتلو له امله په اوبو کې د ډوبو شویو کسانو له ډلې یې ۵۵ کسان ژغورلي، د ۹ تنو جسدونه موندل شوي او د شل نورو د لټون عملیات لا هم دوام لري.
په پښتونخوا کې د ژغورنې ډلي ویلي:« پېښه هغه مهال رامنځته شوه کله چې يوه کورنۍ د سیاحت لپاره د سيند غاړې ته تللي وه. ناڅاپه باران پیل شو د اوبو سطحه لوړه شوه او اوبو په څو شېبو کې ګڼ کسان ډوب کړل.»
د سېلابونو له امله په اوبو کې د ډوب شویو سېلانیانو د کورنۍ یو غړي ویلي، چې د سوات په سیند کې یې د کورنۍ لس غړي ډوب شوي دي، نوموړی حکومت د چټک غبرګون نه ښودلو له امله په بیغورۍ تورنوي: «موږ د سيند پر غاړه سهارنۍ کوله، ماشومانو عکسونه اخيستل، ناڅاپه سېلاب راووت او هر څه يې له ځانه سره يوړل. چې د پېښې له خبرداري سره بیا هم د ژغورني ډلې د پېښې ځای ته یو نیم یا دوه ساعتونه وروسته راورسېدل. زموږ ماشومان زموږ د سترګو په وړاندې اوبو کې ډوبېدل خو هېڅوک يې د ژغورلو لپاره نه وو.»
پر همدغه مهال د پښتونخوا د سر وزیر ویاند فراز مغل ویلي، چې د سیمو خلکو ته د خبرداري نه ورکولو او چټک غبرګون نه ښودلو له امله یې د سوات ځیني سیمه ییز چارواکي له دندې ګوښه کړي او د ځینو دندې یې ځنډولي دي.
دا په داسې حال کې ده، چې د پښتونخوا والي فیصل کریم کنډي د سوات سیند د سېلابونو له امله د نږدې شل کسانو مړه کېدو پېښې ته توند غبرګون ښودلی او وايي، یاده پېښه د صوبايي حکومت د بیغورۍ له امله رامنځته شوې ده.
