د طالبانو تر واک لاندې د افغانستان د مرکزي بانک مرستیال صدیق الله خالد د افغانستان او امریکا د سوداګرۍ د ګډې خونې له مشر جیفري ګریکو سره په لیدنه کې د بانکي اړیکو د پراخولو په اړه خبرې کړي. طالبانو د ګریکو په حواله د بانکي اړیکو د پیاوړتیا لپاره د یوه کنفرانس خبر ورکړ.
ویل شوي چې دغه کنفرانس به د اګسټ په میاشت کې ترسره شي.
د طالبانو تر واک لاندې د افغانستان د مرکزي بانک د خبرپاڼې له مخې، په تېرو درېیو کلونو کې، د افغانستان بانکي سکتور په دوه اړخیزو بانکي اړیکو کې د پام وړ پرمختګ کړی او خلکو ته د مالي تمویالاتو د ورکړې په برخه کې د تېر کال په اندازه ۷۱ سلنه زیاته شوې ده.
د افغانستان د مرکزي بانک مرستیال دا ادعا هم وکړه چې یوازې په تېرو درېیو میاشتو کې، بانکي سکتور کې د امانتونو کچه شاوخوا ۸ میلیارده افغانۍ زیاته شوې.
طالبانو د جیفري ګریکو په حواله وویل چې د افغانستان د مرکزي بانک څخه یو پلاوی هم د اګست میاشت کې کېدونکي کنفرانس ته بلل شوی دی.
مخکې له دې، د ۱۴۰۲ کال د وږي په میاشت کې د امریکا او افغانستان د سوداګرۍ خونې په کابل کې "د افغانستان د سوداګرۍ او اقتصادي اړیکو" تر سرلیک لاندې یو کنفرانس جوړ کړ.
جیفري ګریکو د وږي په پنځمه نېټه د طالبانو له خوا د افغانستان د کنټرول له ترلاسه کولو وروسته د لومړي ځل لپاره کابل ته سفر کړی او په کابل کې یې له ملا عبدالغني برادر او د خصوصي سکتور له یو شمېر استازو سره لیدلي.
