د هند فلمي ستورې شیفالي جړیوالا د زړه د حملې له امله مړه شوه
د هندي فلمي نړۍ پېژندل شوې څېره، مشهوره نڅاګره او د "کانټا لګا" سندرې ویډیو ستورې شیفالي جړیوالا تېره شپه د زړه له ناڅاپي حملې وروسته د ۴۲ کلنۍ په عمر مړه شوه.
د کورنۍ د نږدې سرچینو او امنیتي ادارو د معلوماتو له مخې، پېښه هغه مهال رامنځته شوه چې په شیفالي ناڅاپه د زړه حمله راغله، خو تر روغتون رسېدو مخکې یې ساه ورکړه. د هغې ناڅاپي مړینې نه یوازې د فلمي نړۍ خلک، بلکې زرګونه مینوال هم ژور خفګان کې واچول.
په وروستیو شپو ورځو کې د ژوند نښې
د شیفالي د استوګنې د ټولنې یو امنیتي ګارډ چې د پېښې پر مهال په دنده و، رسنیو ته ویلي دي: «د پېښې له شپې وړاندې ماښام شیفالي او مېړهیې پیراغ تیاګي د خپل سپي سره چکر ته راوتلي وو. خو د شنبې شپه شاوخوا لس نیمې بجې، هغوی په بېړه روغتون ته ولاړل، ما خپله ورته دروازه خلاصه کړه.»
نوموړی ګارډ زیاتوي، کله چې شیفالي روغتون ته یوړل شوه، سمدلاسه پولیس د پېښې ځای ته ورسېدل او هماغه شپه یې د کور تر څنګ دوه تخنیکي موټرې ځای پر ځای کړې.
یوه بل کس چې ویل کېږي د شیفالي نږدې ملګری و، سوسایټي ته په موټرسايکل راغی او نورو ته یې خبر ورکړ: «شیفالي اوس ژوندۍ نه ده.»
دې خبر ډېر خلک حیران کړل، ځکه چې هغوی شیفالي یوازې یوه ورځ مخکې هم لیدلې وه.
پخوانۍ ناروغي او روغتیایي ستونزې
شیفالي په یوې مرکه کې ویلي و، چې د ۱۵ کلنۍ په عمر یې د ذهني فشار له امله د ایپیلېپسي (ایپیلېپسي (Epilepsy) یوه د مغز د فعالیت اختلال دی، چې پکې د مغز حجرې ناڅاپي او بېنظمه برېښنايي فعالیتونه کوي، چې له امله یې انسان ته دوه یا ډېر ځلې د تشنج یا مرګ حملې راځي.) حمله تجربه کړې وه. له هغه راهیسې، دا یوه دوامداره روغتیایي ستونزه وه، خو هغې د خپل هنر او عزم له لارې له دې سره ژوند ته دوام ورکړی و.
له شهرته تر افسوسه – د شیفالي پېژندنه
شیفالي جړیوالا په ۲۰۰۲ کال کې د "کانټا لګا" سندرې ویډیو له لارې ډېر ژر مشهوره شوه.
د هغې ځانګړې نڅا او سټایل هغه له فلمي ستورې څخه د ریالېټي ټلوېزیوني ستورې مقام ته ورسوله.
هغه د هند د مشهورو شوګانو لکه "نچ بلیه" او "بګ باس ۱۳" ګډونواله هم پاتې شوې او تل یې د ښځو د حقونو لپاره غږ پورته کړی و.
د فلمي نړۍ غبرګون
د هغې مړینه د فلمي صنعت لپاره یوه ستره ضایعه بلل شوې ده. ګڼ شمېر فلمي شخصیتونو، همکارانو او مینوالو د ټولنیزو شبکو له لارې د خواشینۍ څرګندونې کړي او د هغې د روح د ارامۍ دعاوې یې کړې دي.
شیفالي جړیوالا یوه داسې هنرمنده وه، چې نه یوازې یې نڅا، بلکې د خپل ژوند اراده او زړورتیا یې هم نورو ته الهام بخښلی وو. د شفالي مینه وال د هغې ناڅاپې مرګ د یو نسل د یادونو یوه برخه ګڼي، خو د هغې هنر او میراث به تل ژوندی وي.