د طالبانو د بېلابېلو وزارتونو یو ګډ پلاوی له نشهيي توکو سره د مبارزې درېیمه ناسته او د خصوصي سکټور تخنیکي کمېټې دویمه ناسته کې د ګډون په موخه قطر ته لاړ. د طالبانو اړوند سرچینې وايي، په پلاوي کې ددې ډلې د عامې روغتیا، کورنیو چارو، بهرنیو چارو او کرنې وزارتونو استازي شامل دي.
طالب سرچینې وايي، ټاکل شوې دغه پلاوی د بېلابېلو هېوادونو له استازو سره د نشهيي توکو د مخنیوي او کنټرول په برخه کې د همکاریو پر پراختیا خبرې وکړي.
قطر دا اونۍ په دوحه کې د افغانستان د مخدره توکو ضد کارډلې درېیمه او د افغان خصوصي سکتور د ملاتړ کارډلې دویمې ناستې کوربه توب کوي.
تېره اونۍ په ملګرو ملتونو کې د قطر دایمي استازې عالیه احمد بن سیف الثاني وویل، چې دغه ناستې د جون له ۳۰مې نه د جولای تر لومړۍ نېټې پورې د دوحې بهیر په چوکاټ کې جوړیږي.
عالیې زیاته کړه چې د قطر دولت د قطر پراختیایي صندوق له لارې د ملګرو ملتونو له ادارو سره په همکارۍ، خپلو بشري مرستو ته دوام ورکوي.
د نوموړې په وینا، دغه مرستې د خوراکي توکو مرسته، د لومړنيو روغتیایي پروګرامونو ملاتړ، زده کړو ته د افغان ماشومانو د لاسرسي ښه کول، بورسونه، د افغان مېرمنو اقتصادي پیاوړتیا، له کړکېچونو سره د هغوی د مقاومت لوړول او د افغان ځوانانو د ظرفیت لوړونې پروګرامونه رانغاړي.
