محسن داوړ: په پاکستان کې ترهګري د دولت د ناسمو پالیسیو پایله ده
په شمالي وزیرستان کې پر پاکستاني پوځیانو له خونړي برید وروسته اوس په دې سیمه کې پر تګ راتګ محدودیتونه لګول شوي دي. د ملي ډېموکراټیک غورځنګ مشر محسن دواړ دغه وضعیت ته په غبرګون ویلي، د شمالي وزیرستان خلک د ترهګرو د بریدونو له امله د تګ راتګ محدودیتونو سره مخ دي.
محسن داوړ زیاتوي، د پاکستان دولت د شمالي وزیرستان د خلکو د ساتنې پر ځای هغوی د وزیرستاني والي له امله مجازات کوي.
ښاغلي داوړ په ډاګه ویلي، چې ترهګري د پاکستان دولت د ناسمو پالیسیو زېږنده ده.
محسن داوړ پر خپلې اېکس پاڼې لیکلي: «دولت زموږ د خلکو د ساتنې پر ځای هغوی د وزیرستاني توب له امله مجازات کوي. ترهګر د دولت د ناسمو پالیسیو پایله ده.»
د خېبرپښتونخوا د شمالي وزیرستان د غلام خان بندر ته څېرمه د پاکستاني پوځيانو پر موټریز کاروان په موټر بم برید کې ۱۳ پوځيان وژل شوي او د ښځو او ماشومانو په ګډون یو شمېر نور ټپيان شوي دي.
له دغه خونړي برید وروسته د پاکستان د پوځ مشر عاصم منیر خېبرپښتونخوا ته ولاړ او په ټينګار سره یې وویل، له عاملینو به غچ اخلي او په وینا یې، ترهګر به بېدرېغه تعقیب کړي او "په سیمه کې به د ترهګرۍ اصلي سرچينه" افشا کړي.
عاصم منیر د دې برید د قربانیانو د جنازې په مراسمو کې وویل، ټول هغه کسان چې ترهګرۍ ته زمینه برابروي، ملاتړ یې کوي یا په کې ښکېل دي، بېوقفې به تعقیب او عدالت ته به وسپارل شي.
د پاکستان پوځ هند تورن کړی، چې په دې برید کې لاس لري؛ خو نوي ډیلي دا تور رد کړی دی.
د اتحاد المجاهدین پاکستان په نوم یوې وسله والې ډلې د یاد موټر بم برید مسوولیت منلی دی.
پاکستاني رسنیو راپور ورکړی، چې د برید مسوولیت یوې داسې ډلې پر غاړه اخیستی چې له تحریک طالبان پاکستان سره تړاو لري او د حافظ ګل بهادر تر مشرۍ لاندې فعالیت کوي.