د فرانسې د ولسمشرۍ دفتر اعلان کړی، چې امانوېل مکرون د چنګاښ په ۸مه د ایران له ولسمشر مسعود پزشکیان سره په ټلیفوني خبرو کې وویل، چې تهران دې د اټومي او توغندیزو مسایلو د حل لپاره بېرته خبرو ته را وګرځي.
د رویټرز د راپور له مخې، مکرون په دې ټلیفوني خبرو کې غوښتنه کړې چې ایران دې له نړۍوالې اټومي انرژۍ ادارې سره سمدستي همکاري بېرته پیل کړي او د اټومي وسلو د نه خپرولو تړون چوکاټ دې وساتي.هغه ټینګار کړی، چې ایران باید ژر تر ژره خبرو اترو ته بېرته راوګرځي، ترڅو د اټومي او توغندیز پروګرام اړوند مسایل یې وڅېړل شي.د فرانسې ولسمشر د سیمې د اوربند د درناوي پر اړتیا ټینګار وکړ او ویې ویل، دا منځني ختیځ ته د سولې د بېرته راګرځولو په لور یو مهم ګام دی.مکرون له پزشکیان سره په دغه ټلیفوني خبرو کې د دوو فرانسوي وګړو «سسیل کولر» او «ژاک پاریس»، د ازادېدو غوښتنه وکړه، چې دا مهال په ایران کې بنديان دي.
